SHBA, administrata Trump kundra
mediave,Priebus:Do të luftojmë 

Ai është president prej vetëm pak ditësh, e megjithatë që tani Donald Trump dhe stafi i tij janë përfshirë në një debat të ashpër me mediat amerikane.

Polemikat lidhur me mbulimin e ceremonisë së tij të betimit si presidenti i 45 i SHBA-ve, janë indikatorët e parë se si do të jetë kjo marrëdhënie me median.

Gjithçka nisi me fotografitë e publikuara nga disa media që tregonin një diferencë të madhe të pjesëmarrjes së qytetarëve gjatë ceremonisë së betimit të Trump, me atë të Obamës në 2009-ën.

Por administrata Trump ka reaguar me zemërim duke sfiduar tërësisht raportimet, ndërsa vetë presidenti I quajti gazetarët “mes qënieve njerëzore më të pandershme të planetit”. Pas kritikave të vetë shefit të Shtëpisë së Bardhë, vjen dhe deklarata e ashpër e shefit të stafit Reince Priebus. “Ekziston një mani e mirëfilltë për të delegjitimuar Presidentin, por nuk do të rrimë duarkryq e thjesht të pranojmë se çfarë thonë. Ne do të luftojmë çdo ditë dhëmbë për dhëmbë”, deklaroi Priebus.

Ndërkohë në deklaratën e parë për mediat, si sekretar I shtypit të Shtëpisë së Bardhë, Sean Spicer dha edhe shifra lidhur me pjesëmarrësit, që disa prej mediave amerikane I kanë cilësuar si gënjeshtra.
 
Redaksia Online
e.m/Shqiptarja.com