SHBA/ Hunter Biden paraqitet në Gjykatë, ndaj tij rëndojnë akuza federale për armëmbajtje të paligjshme

SHBA/ Hunter Biden paraqitet në Gjykatë, ndaj tij rëndojnë akuza federale për armëmbajtje të paligjshme

Hunter Biden

SHBA - Hunter Biden u paraqit të premten para një gjykatë në shtetin Dellauer për një seancë përfundimtare, përpara se të nisë procesi gjyqësor ndaj tij nën akuza federale për armëmbajtje të paligjshme. Ky zhvillim vjen ndërsa babai i tij, Presidenti Joe Biden po zhvillon fushatë elektorale për t’u rizgjedhur.

Hunter Biden akuzohet se ka gënjyer lidhur me përdorimin e drogës në tetor 2018, në formularin që i duhej të plotësonte për të blerë një armë zjarri, të cilën e mbajti për rreth 11 ditë. Ai e ka pranuar se gjatë asaj periudhe ishte nën varësinë e kokainës. Avokatët mbrojtës të tij thonë se Hunter Biden nuk ka shkelur ligjin dhe se çështja është e motivuar politikisht.

Dokumentet e gjykatës tregojnë qëndrimet e kundërta të palëve mbi provat e paraqitura mbi rastin, përfshirë të dhëna të gjetura në kompjuterin që Hunter Bideni dyshohet se e kishte lënë për riparim në një dyqan në Dellauer.

Avokatët mbrojtës vënë në pikëpyetje vërtetësinë e të dhënave të laptopit, por prokurorët thonë se nuk ka prova që të dhënat janë komprometuar dhe se një betejë e zgjatur mbi këtë çështje në gjykatë do të ishte humbje kohe sipas tyre.

Laptopi ka qenë burim polemikash për vite me radhë pasi persona të dyshuar si republikanë arritën dhe shpërndanë të dhëna personale që ndodheshin në të.

Prokurorët planifikojnë gjithashtu t'u tregojnë anëtarëve të jurisë pjesë nga një përmbledhje me kujtime të Hunter Bidenit të vitit 2021, titulluar "Gjëra të bukura", ku ai jepte detaje mbi betejën e tij me alkoolin dhe abuzimin me drogën, pas vdekjes në vitin 2015, të vëllait të tij të madh, Beau, nga kanceri i trurit në moshën 46-vjeçare.

Avokatët mbrojtës thonë se prokurorët kanë zgjedhur ato çka u intereson nga libri dhe kërkojnë të përfshijnë gjithashtu më shumë informacione që ata vetë kanë zgjedhur.

Seanca e sotme pritet të jetë seanca e fundit paraprake përpara fillimit të procesit gjyqësor me përzgjedhjen e jurisë më 3 qershor.

Hunter Biden përballet gjithashtu me akuza federale në Los Anxhelos që lidhen me taksat dhe do të gjykohet për këtë rast në shtator. Ai akuzohet se ka dështuar të paguajë të paktën 1.4 milionë dollarë në taksa gjatë katër viteve, ndërkohë që ka patur një "mënyrë jetese ekstravagante" gjatë një periudhe në të cilën ai ka pranuar se po luftonte me varësinë ndaj drogës. Që nga ajo kohë Hunter Biden i ka paguar taksat e prapambetura.

Avokatët e Hunter Bidenit kanë nxitur, por pa sukses në të dyja rastet, që aktpaditë ndaj tij të rrëzohen. Ata kanë argumentuar, ndër të tjera, se prokurorët iu nënshtruan presionit politik për ta paditur atë, edhe pse kishin arritur më parë një marrëveshje për pranimin e fajësisë nga ana e klientit të tyre e cila më pas dështoi në gjykatë. Republikanët, mes tyre edhe zoti Trump, e kanë ironizuar publikisht marrëveshjen, duke e quajtur atë si tejet të favorshme për Hunter Biden-in.

Zoti Trump, i cili rikandidon përballë presidentin demokrat, përballet me problemet e tij ligjore. Ndaj tij janë rëndojnë katër çështje penale.

Hetimi i gjatë federal ndaj djalit të presidentit u duk se po shkonte drejt fundit pas marrëveshjes për pranimin e fajësisë vitin e kaluar, por ajo dështoi pasi një gjykatës ngriti pikëpyetje lidhur me të. Më pas ndaj Hunter Bidenit u ngritën zyrtarisht akuza.

Sipas marrëveshjes, Hunter Biden do të kryente për dy vjet shërbim prove, pasi u vetëdeklarua fajtor për akuzat për kundërvajtje tatimore. Marrëveshja parashikonte gjithashtu që ai të mos ndiqej penalisht për akuzat për armëmbatje, nëse do t’u qëndronte larg problemeve./ VOA

G.K/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Shqipëria humb me Italinë, a ka shanse të kalojë grupin në Euro 2024?



×

Lajmi i fundit

Euro 2024/ Anglia i falet Bellingham, 'Tre Luanët' mposhtin 0-1 Serbinë

Euro 2024/ Anglia i falet Bellingham, 'Tre Luanët' mposhtin 0-1 Serbinë