Një marrëveshje gjigante për naftën. Shtetet e Bashkuara do të kontrollojnë mbi 65 miliardë fuçi nga rezervat e naftës së Venezuelës. Këtë e ka bërë të ditur Donald Trump në platformën Truth Social: “Bëhet fjalë për marrëveshjen më të madhe të naftës në historinë e botës”. Ai saktëson se marrëveshja do të jetë “me kosto zero për taksapaguesin amerikan”.

“Kjo marrëveshje historike më shumë se dyfishon rezervat e naftës së Amerikës, rrit ndjeshëm furnizimin tonë me naftë dhe do të ulë në mënyrë të konsiderueshme çmimet e karburantit për të gjithë amerikanët për një periudhë të gjatë në të ardhmen, ndërsa njëkohësisht do të ndihmojë që Venezuela të shkojë drejt një suksesi të jashtëzakonshëm dhe një prosperiteti të madh”, shkruan presidenti amerikan.

Sipas Trump, marrëveshja “do të forcojë ndjeshëm marrëdhënien tashmë në rritje” mes Uashingtonit dhe Karakasit.

Pas operacionit amerikan që në janar çoi në kapjen e presidentit Nicolás Maduro, Trump kishte njoftuar menjëherë se nga Venezuela do të mbërrinin në Shtetet e Bashkuara nga 30 deri në 50 milionë fuçi naftë.

Më pas, në shkurt, pesë kompani të mëdha të naftës morën nga autoritetet amerikane licencën për të operuar në vendin e Amerikës së Jugut. Mes tyre ishte edhe kompania italiane Eni.

Marrëveshja e re do t'u garantojë Shteteve të Bashkuara “55% të prodhimit efektiv të një sipërmarrjeje të re të përbashkët private, e cila do të jetë kompania e dytë më e madhe private e naftës në botë për nga rezervat”, raporton CNN.

Rrjeti amerikan citon një zyrtar të Shtëpisë së Bardhë, sipas të cilit, me mbështetjen e Shteteve të Bashkuara, presidentja Rodriguez i ka dhënë një kompanie private koncesione 100-vjeçare për shfrytëzimin e vendburimeve të naftës.

Sekretari amerikan i Shtetit, Marco Rubio, e ka cilësuar marrëveshjen “një fitore të jashtëzakonshme si për popullin amerikan, ashtu edhe për Venezuelën”.

Rubio shtoi se marrëveshja “do t'i sjellë popullit venezuelian gati 100 miliardë dollarë investime private, do të mbështesë mijëra vende pune të mirëpaguara dhe do të udhëheqë rindërtimin e ekonomisë së Venezuelës”./La Repubblica