Paralajmërimi i Pence ka ardhur gjatë një interviste për “ABC News”, ndërkohë që tensionet mes dy vendeve kanë filluar të rriten, pas vendosjes së sanksioneve të SHBA-së kundër Iranit, për testimin e një rakete balistike.
“Irani do të bënte mirë që të shikonte kalendarin dhe të kuptojë se në Zyrën Ovale tani është një president i ri. Dhe, Irani do të bënte mirë që të mos e testojë përkushtimin e presidentit të ri”, ka deklaruar Pence.
Ndërkohë i pyetur nga “ABC News” për reagimin e presidentit nëse Irani do të provokonte, ai është shprehur se “presidenti do të merrte parasysh çdo masë”.
Pence gjithashtu ka bërë të ditur se SHBA-ja është duke kontrolluar marrëveshjen e vitit 2015-të, e cila e detyron Iranin të kufizojë aktivitetin bërthamor në mënyrë që të lehtësohen sanksionet e vendosura ndaj tij.
Nga ana tjetër, Irani e ka mohuar që testimi i raketës balistike të ketë dhunuar rezolutën e Këshillit të Sigurimit, të arritur me gjashtë fuqitë botërore, përfshirë edhe SHBA-në.
Redaksia Online
D.T/Shqiptarja.com