SHBA, Obama: E nënvlerësova
ndikimin rus në zgjedhje

Presidenti në largim i SHBA-vë, Barack Obama, është shprehur se e ka nënvlerësuar ndikim që mund të kishte një ndërhyrje kibernetike e Rusisë në zgjedhjet presidenciale.

“Mendoj se nënvlerësova se në ç’shkallë, në këtë erë të re informacioni, është e mundur që keqinformimi, sulmet kibernetike të ndikojë tek shoqëritë tona të hapura, në sistemet tona, të depërtojnë në praktikat tona demokratike në mënyra të tilla që unë mendoj se po përshpejtohen”, është shprehur ai në një intervistë për televizionin amerikan ABC.

Obama ka deklaruar se sulmet kibernetike të Rusisë nuk janë bërë vetëm në SHBA, por për një kohë të gjatë ato kanë qenë të pranishme edhe në Evropë,ku janë parë fillimisht në ish vendet satelit të Bashkimit Sovjetik.

Ndërkohë një raport mbi ndërhyrjen ruse në zgjedhjet presidenciale në SHBA, është bërë publik nga agjencitë e inteligjencës, ku pas publikimit të tij nuk ka munguar as reagimi i presidentit të zgjedhur të Amerikës, Donald Trump,i cili është shprehur se nuk është gjetur asnjë provë se janë manipuluar rezultatet e zgjedhjeve.

Nga ana tjetër, Obama, ka treguar se ka zhvilluar disa telefonata me Trump, ku i është përpjekur t’i përcjellë mesazhin se ka një ndryshim të madh mes qeverisjes dhe bërjes së fushatës dhe se pas bërjes së betimit do të jetë në krye të institucionit më të madh në botë.

Obama dhe Trump, kanë patur disa përplasje gjatë javëve të fundit, ku Trump e ka akuzuar presidentin në largim se po krijon pengesa në transferimin e pushtetit presidencial.

Redaksia Online
D.T/Shqiptarja.com