SHBA: Shqipëria, një "lavatriçe" parash

SHBA: Shqipëria, një "lavatriçe" parash
WASHINGTON- Sipas Departamentit amerikan të Shtetit, Shqipëria mbetet një vend me legjislacion dhe praktika "shqetësuese" sa i përket pastrimit të parave të pista. Raporti "Pastrimi i parave dhe krimi financiar" i Zyrës përkate pranë këtij Departamenti e vendos vendin tonë në një kategori me vende të tilla, si Koreja e Veriut, Moldavia, Bosnja, Laosi, Azerbajxhani, Kazakistani, Serbia, Kosova dhe disa dhjetëra vende të tjerë, vende, ku ekzistojnë ligje dhe institucione për të luftuar këtë fenomen, por rezultatet në këtë luftë janë të dyshimta.

Raporti i institucionit më të lartë diplomatik të SHBA ka theksuar se Shqipëria është "një vend tranziti për trafikimin e narkotikëve, armëve, mallrave kontrabandë dhe qenieve njërëzore dhe mbetet në rrezik për pastrimin e parave. Burimet më të mëdha të të ardhurave të paligjshme janë trafiqet, korrupsioni i zyrtarëve dhe mashtrimi". Krimi shpesh investon paratë e pista në prona të patundshme dhe në projekte për zhvillimin e biznesit, thuhet më tej në raport. Sipas zyrtarëve amerikanë, në Shqipëri ka një treg të madh të zi për mallra të tilla, si duhani, bizhuteritë dhe telefonat celularë, si pasojë e nivelit të lartë të importimit të mallrave të konsumit dhe kontrolleve të dobëta doganore. Madje, "grupe të organizuara kriminale e përdorin Shqipërinë si një bazë operacionale për ndërmarrjen e veprimtarive kriminale në vende të tjera e shpesh ato i sjellin fitimet e tyre të paligjshme në Shqipëri. Paratë e fituara nga këto veprimtari shpëlahen lehtësisht në Shqipëri pasi aty kryesisht sundon ende një ekonomi e bazuar në para' në dorë dhe hyrja e parave nga jashtë në formën e prurjeve valutore të emigrantëve janë të zakonshme". Raporti përmend statistikën e Bankës së Shqipërisë, sipas të cilës rreth 20 për qind e parasë në qarkullim ndodhet jashtë sistemit bankar.

Para DASH, edhe Moneyval, komitet ekspertësh i Këshillit të Evropës për luftën kundër krimit financiar, ka konstatuar se, ndonëse vendi ynë ka bërë përparime të konsiderueshme kundër pastrimit të parave dhe financimit të terrorizmit, rreziku i pastrimit "mbetet i lartë".
(sg/shqiptarja.com)

  • Sondazhi i ditës:

    Mendoni se komisionet hetimore për Shëndetësinë e TIMS do kenë rezultat?



×

Lajmi i fundit

'Durrah City', Qeveria akordon 900 mijë euro për akademinë e futbollit

'Durrah City', Qeveria akordon 900 mijë euro për akademinë e futbollit