SHBA, sulmohet statuja e Presidentit Xhekson! Trump: Dhjetë vjet burg për ata që vandalizojnë monumentet (FOTO)

Natën e mbrëmshme rreth 300 protestues të mbledhur përpara Shtëpise së Bardhë, u përpoqën të rrëzonin statujën e idhullit të Trump, presidentit amerikan Andrew Jackson, i akuzuar nga grupe të caktuara si përgjegjës për të ashtuquajturin 'shteg lotësh' (dëbimi i detyruar i amerikanëve vendas nga trojet e tyre).

Protestuesit arritën të lidhin statujën më disa litarë me qëllim për ta rrëzuar por ndërhyrja e policisë, e cila përdori ndaj tyre sprait piperi, shmangu vandalizimin.

Statuja Jackson ndodhet në Sheshin Lafayette, afër ndërtesës presidenciale. Ajo është një nga objektivat e zemërimit të protestuesit që kanë pushtuar prej rreth dy javësh rrugët amerikane për të protestuar kundër vdekjes së afrikano amerikanit George Floyd më 25 maj, vrarë nga një polic I bardhë.

Shumë statuja të tjera të shpërndara nëpër Shtetet e Bashkuara tashmë janë shënjestruar dhe vandalizuar.

Presidenti Trump tha se ai "autorizoi qeverinë federale të arrestojë këdo që vandalizon ose shkatërron ndonjë monument, statujë ose pronë tjetër federale në Shtetet e Bashkuara dhe burgimin e shkaktarëve me deri dhjetë vite burg”.