Shehu: Ligji i luftës po përdoret
si gogol, çamët nuk përfitojnë gjë

Deputeti i PD, Tritan Shehu i ftuar në emisionin ’45 Minuta’ të Denis Mingës në Report Tv kërkon që qeveria të reflektojë dhe të tërhiqet nga vota kundër SHBA në OKB. Megjithatë, pavarësisht mocionit për debat në Kuvend, ai pranoi se shumica do të votojë kundër. “Pas votës ndodhi që Shqipëria nuk u ftua në festën e fundvitit dhe para një jave në mbledhjen e përbashkët të Kongresit me Senatin, Trump tha se ata që votuan kundër nuk janë miq të SHBA”.

Tritan Shehu komentoi edhe marrëveshjet me Greqinë që pritet që të miratohen. “Marrëveshja e re në rastin më të mirë do të jetë sikur ishte. Deklaratat e ministrit grek për 12 miljet? Greqia është një shtet serioz, Bushati nuk ka dhënë asnjë shpjegim, është përgjegjësia e tyre.

Ligjin e luftës po e përdorin si gogol sikur do të plasë lufta me Greqinë, janë përralla me mbret. Ligjin e luftës duhet ta heqin ata dhe jo ne, pasi ne nuk e kemi këtë ligj me ata. Ky ligj është i vdekur, pasi ne jemi në NATO me Greqinë bashkë”.

Por a i përfitojnë çamët pronat nëse hiqet ligji i luftës? Në këtë pikë, Shehu është dakord me Bushatin. “Bushati e tha drejt, se pronat e çamëve varet nga ligj tjetër. Ligji i dënimit të bashkëpunëtorëve të nazizmit, tha edhe një gjë tjetër me të drejtë, që shqiptarët duhet t’i drejtohen gjyqit për këtë gjë” përfundoi ai.

d.b/shqiptarja.com