SHISH i kënaqur 1.4 mld,
12.5% më shumë fonde se 2013

TIRANE- Në një seancë me dyer të mbyllura ka raportuar dje në Kuvend kreu i SHISH, Visho Ajazi, i cili siç mësohet nga burime brenda Komisionit të Sigurisë është shprehur i kënaqur me këtë shtim të fondit. Në projektet që janë paraqitur në komision para deputetëve të mazhorancës, kreu i SHISH ka paraqitur kërkesat për rikonstruksion të zyrave të Arkivit Qendror në SHISH, blerje automjetesh, pajisjesh teknike dhe vegla pune, apo dhe pajisje kompjuterike dhe rikonstruksionin e zyrave të SHISH në Sarandë. Ndërkohë që për vitin 2014 Ministria e Financave ka planifikuar që këtij institucioni ti japë plot 1.483.300 milion lekë, ku nga këto rreth 400 milion lekë të vjetra janë për buxhetet e familjarëve dhe individëve të këtij institucioni.

Ndërkohë që seanca e djeshme u zhvillua me dyer të mbyllura, ku edhe në seancëm e djeshme munguan deputetët e opozitës. Në një prononcim për mediat,anëtari i këtij komisioni, Pirro Lutaj konfirmoi rritjen që i është bërë këtij institucioni të rëndësishëm, ku sipas së cilit më shumë rëndësi iu kushtua pagave të punonjësve. Ai akuzoi opozitën për bojkotin që i bënë mbledhjes duke theksuar se ka frikë nga rritja e buxhetit për vitin 2014 që ka bërë qeveria të gjitha institucioneve. “Largimi i tyre në mënyrë demostrative dhe komplet të pakuptimtë nga komisioni ka të bëj me atë që ju thashë.

Ata nuk i dëgjojnë dot shifrat në rritje të buxhetit të institucionit të sigurisë, të dhënë nga maxhoranca e tanishme." tha Lutaj. Lidhur me pretendimet e deputetëve të opozitës të cilët deklaruan se do të rikthehen në Komisionin e Sigurisë, vetëm atëherë kur ministri Tahiri të raportojë për vrasjen e dy vëllezërve nga Korça, Lutaj tha se kërkesa e tyre do të diskutohet pas miratimit të buxhetit të ministrisë së brendshme në këtë komision. Sa i takon miratimit në parim të buxhetit për shërbimin informative, ai tha se për herë të parë kjo paketë përmbush të gjitha nevojat e këtij dikasteri.
 
Shkrimi u publikua sot (21.12.2013) në gazetën Shqiptarja.com (print)

Redaksia Online
(d.d/shqiptarja.com)

/Shqiptarja.com

TAG:
• visho ajazi lika