Ekstazi me logon e ‘Louis Vuitton’, sekuestrohen mbi 11 mijë tableta me vlerë 400 mijë euro në Tiranë! Droga vinte nga Kosova! Mes 5 të arrestuarve edhe zyrtari i LVV-së

Lëvizja vetëvendosje ka përjashtuar nga strukturat e partisë Besnik Mujaecin. Ai së bashku me 4 të tjerë u arrestua pasi u kapën duke shitur ekstazi në lokalet e Tiranës. Pas kontrolleve të policisë u sekuestruan 11 mijë doza ekstazi gati për shitje.

E plotë:

Pas marrjes së informacionit për arrestimin e asambleistit të Komunës së Prishtinës nga radhët e subjektit tonë, Komisionin Diciplinor i LVV menjëherë ka trajtuar këtë rast.

Si rrjedhojë Komisioni Diciplinor i Lëvizjes VETËVENDOSJE! në mbledhjen e tij mori vendim për përjashtimin e anëtarit Besnik Mujeci nga anëtarësia dhe të gjitha strukturat e Lëvizjes VETËVENDOSJE!

Lëvizja VETËVENDOSJE! mbetet e përkushtuar që dukuritë e tilla të dënueshme dhe kundërligjshme, janë absolutisht të patolerueshme dhe do të luftohen e ndëshkohen.

Arlind Manxhuka, në një prononcim për Report Tv në lidhje me arrestimin e Besnik Mujecit, anëtari i LVV-së (Lëvizje Vetëvendosje) i cili u kap në Tiranë bashkë me 4 persona të tjerë duke shpërndarë drogë ekstazi, thotë se po zhvillojnë një mbledhje urgjente për këtë rast dhe do të marrin një vendim.

‘Me të marrë informacionin kemi iniciuar menjëherë procedurën disiplinore me ç’rast Komisioni Disiplinor i LV-së do të mbajë mbledhje urgjente për të trajtuar rastin në fjalë. Pas mbledhjes do t’ju njoftojmë mbi vendimin!- tha Manxhuka sekretar për mediat në LVV.

Pesë persona nga Kosova dhe Shqipëria, u arrestuan në Tiranë me 11 mijë doza droge sintetike ekstazi me vlerë 400 mijë euro. Një prej të prangosurve është edhe anëtar i Lëvizjes Vetëvendosje. Report Tv ka siguruar fotot e 5 të arrestuarve, konkretisht Mithat Ramadani 30 vjeç, Besnik Mujeci, 40 vjeç, të dy banues në Prishtinë, si dhe Kalem Picari, 24 vjeç, Ambra Myftari 28 vjeçe, dhe Daniel Avdija 26 vjeç, të tre banues në Tiranë.

Drejtoria e Policisë në Tiranë ka bërë të ditur se pas një aksioni policor të koduar “Punisher 2” që shpërndanin ekstazi ka arrestuar pesë persona, dy prej tyre shtetas të Kosovës.

Dy shtetasit nga Kosova që janë kapur nga Policia e Shqipërisë si të dyshuar për trafikim të lëndëve narkoktike nga Kosova për në Shqipëri janë Mithat Ramadani 30 vjeç dhe Besnik Mujeci 40 vjeç, të dy banues në Prishtinë.

Burime për Report Tv bëjnë me dije se Besnik Mujeci është anëtar i Lëvizjes Vetëvendosje dhe asamblist i partisë që drejton kryeministri Albin Kurti në Komunën e Prishtinës.

Personat e dyshuar janë arrestuar në kryqëzimin e rrugëve “Myslym Shyri” dhe “Sami Frashëri”, së bashku me dërgesën me lëndë të dyshuar narkotike, prej 11 300 tabletash ekstazi MDMA, me peshë 5.093 kg dhe vlerë tregu rreth 400 mijë euro.

Janë publikuar pamjet nga operacioni ‘Punisher’ ku u sekuestruan 11 300 tableta ekstazi që vinin nga Kosova nëpërmjet linjës së autobusëve të pasagjerëve Prishtinë-Durrës. Në tabletat ekstazi siç shihet është stampuar logoja e markës luksoze ‘Louis Vuitton’. Droga pasi vinte në Durrës shpërndahej në Tiranë e qytete bregdetare nëpërmjet makinave të marra me qira.

Një sasi e madhe ekstazi është sekuestruar nga policia e Tiranës pas goditjes së një grupi shpërndarësish droge. Në kuadër të operacionit ‘Punisher 2’ u sekuestruan 11 mijë e 300 ekstazi me peshë 5 kg. Ekstazia vinte nga Kosova me linjën e autobusëve Prishtinë Tiranë dhe shpërndahej në zonën e ish-Bllokut në Tiranë. Sipas policisë ekstazia dërgohej nga Durrësi në Tiranë ose drejt qyteteve bregdetare nëpërmjet makinave me qira e shkëmbimi bëhej në vende publike me shumë njerëz.

Deklarata e plotë e policisë
 
Drejtori i Drejtorisë Vendore të Policisë Tiranë, Drejtues i Parë Tonin Vocaj në konferencë për shtyp në lidhje me finalizimin me sukses pas një hetimi disamujor të operacionit policor të koduar “PUNISHER 2”. Jam sot këtu së bashku me Zëvendësdrejtorin për Hetimin e Krimit të Organizuar dhe Krimeve të Rënda, Zëvendësdrejtorin për Sigurinë Publike dhe shefin e Sektorit për Hetimin e Narkotikëve, për të bërë prezente rezultatet e operacionit të koduar “PUNISHER 2”, në kuadër të të cilit u godit një grup që trafikonte nga Kosova në Shqipëri dhe shpërndante lëndë narkotike ekstazi MDMA. Në janar të këtij viti, është finalizuar operacioni policor i koduar "PUNISHER", në kuadër të cilit u godit një grup shpërndarësish të drogave sintetike, u arrestuan 3 shtetas dhe u shpall në kërkim një tjetër, si dhe u sekuestruan 1007 tableta ekstazi MDMA.

Drejtoria Vendore e Policisë Tiranë, në vijim të operacioneve të njëpasnjëshme të zhvilluara për parandalimin, evidentimin dhe goditjen e veprimtarisë kriminale në fushën e narkotikëve, në vijim të veprimeve të thelluara në drejtim të hetimit të furnitorëve për grupin e arrestuar në janar, kanë rënë në gjurmët e një rrjeti që trafikonte sasi të mëdha droge sintetike, nga Kosova në Shqipëri. Pas një hetimi disamujor me metoda speciale të hetimit, nga Specialistët e Sektorit për Hetimin e  Narkotikëve në Drejtorinë Vendore të Policisë Tiranë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, u siguruan prova ligjore për dokumentinin e veprimtarisë kriminale të këtij grupi që përbëhej nga 5 persona.

Mbi bazën e provave të siguruara gjatë hetimit, u organizua dhe finalizua operacioni policor i koduar “PUNISHER 2”, në kuadër të të cilit u vunë në pranga shtetasit: Mithat Ramadani 30 vjeç, Besnik Mujeci, 40 vjeç, të dy banues në Prishtinë, si dhe Kalem Picari, 24 vjeç, Ambra Myftari 28 vjeçe, dhe Daniel Avdija 26 vjeç, të tre banues në Tiranë.

Shtetasit e arrestuar janë lokalizuar në kryqëzimin e rrugës "Myslym Shyri" dhe "Sami Frashëri", së bashku me dërgesën me lëndë të dyshuar narkotike, prej 11300 tabletash ekstazi MDMA, me peshë 5.093 kg dhe vlerë tregu rreth 400 mijë euro.

Nga hetimet ka rezuluar se këta shtetas, duke shfrytëzuar fluksin e sezonit turistik i kalonin dërgesat nëpërmjet linjave të autobusave Prishtinë-Tiranë. Pasi dërgesat arrinin në Tiranë, transportoheshin me autovetura të marra me qira në Tiranë dhe në qytete të tjera, kryesisht bregdetare, dhe vendet e shkëmbimit caktoheshin në vende publike me shumë lëvizje dhe fluks njerëzish. Për arritjen e marrëveshjeve me shpërndarësit e drogave sintetike në Shqipëri, trafikantët kërkonin pagesa paradhënie, ose edhe lënien e automjeteve si garanci. Tabletat e ekstazisë MDMA, së bashku me një sasi lënde narkotike kanabis, një automjet, si dhe 5 aparate celulare, u sekuestruan në cilësinë e provës materiale.

Drejtoria Vendore e Policisë Tiranë mbetet e angazhuar maksimalisht për të parandaluar dhe luftuar veprimtarinë kriminale në fushën e kultivimit, prodhimit dhe shpërndarjes së drogave të lehta dhe të forta. Dëshiroj të falenderoj publikisht drejtuesin e Prokurorisë së Rrethit Gjyqësor të Juridiksionit të Përgjithshëm Tiranë z. Arenc Çela dhe prokurorin e çështjes z. Ndini Tavani, për drejtimin me profesionalizëm dhe vendosmëri të këtij hetimi. Sigurojmë qytetarët se strukturat e Policisë që operojnë në qarkun e Tiranës së fundmi edhe në territorin e Bashkisë Krujës po vijojnë me përkushtim luftën e pandërprerë kundër çdo paligjshmërie dhe në këtë kuadër ftojmë qytetarët që të bashkëpunojnë akoma më shumë me strukturat policore me qëllim,  krijimin e një ambienti akoma edhe më të sigurtë për qytetarët, vizitorët dhe turistët, e mbi të gjitha për të ardhmen e fëmijëve tanë.
 

Report Tv ka siguruar foton e dozave të ekstazisë që shpërndaheshin në lokalet e ish-Bllokut në Tiranë. Në kokrrat e drogës ekstazi shihet se janë stampuar logoja e 'Louis Vuitton'. Burime bëjnë me dije se janë sekuestruar rreth 10 mijë doza ekstazi.