Lushnjë - Pesë muaj hetime çuan policinë e Fierit në arrestimin e një shpërndarësi të drogave të forta në qendër  të Lushnjës.

Marko Xhafa 32 vjec, dyshohet se shpërndante në këtë qytet droga të forta përfshirë kokainën.

Burime nga komisariati i Lushnjës sqaruan se 32 vjeçari lëvizte me automjet duke tregtuar lëndën narkotike. Policia e Fierit shtoi se i riu është me precedentë penal në krimet kundër pasurisë, por nuk ka qenë i dënuar më parë.

Po këto burime thanë se hetimi për rastin po vazhdon për të zbardhur se nga e merrte drogën 32 vjeçari.Në momentin e arrestimit Xhafa kishte me vete dhjetëra doza kokaine të cilat u sekuestruan si provë materiale.

Për policinë e Fierit kapja e tij është vetëm fillimi i një hetimi më të gjerë për zbardhjen dhe çmontimin e një rrjeti të madh të trafikimit dhe shpërndarjes së drogave të forta në zonë.

Aktivitetin e tij 32 vjeçari e kamuflonte duke udhëtuar jashtë vendit si punëtor sezonal në vendet fqinje, por drogën dyshohet se e blinte brenda vendit për ta shpërndarë më pas në zona të ndryshme të Lushnjës.

“Si rezultat i administrimit të shpejtë të informacioneve të siguruara në rrugë operative, për një shtetas që shiste lëndë narkotike të forta, në doza, në zona të ndryshme të rrethit Lushnjë, specialistët e Seksionit për Hetimin e Narkotikëve dhe shërbimet e Komisariatit të Policisë Lushnjë kapën dhe vunë në pranga autorin e dyshuar të kësaj veprimtarie kriminale, shtetasin M. Xh.,32 vjeç, banues në Lushnjë.

Gjatë kontrollit fizik, këtij shtetasi iu gjet sasi lënde e dyshuar narkotike Kokainë, e ndarë në doza, gati për shitje”, njoftoi sot policia.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.