Shkup, Rama reagon
për arrestimin e shqiptarëve

SHKUP – Kryetari i Partisë Socialiste, Edi Rama gjatë promovimit të librit të tij, “Kurbani” në Maqedoni ka komentuar arrestimin, pak ditë më parë të 4 shtetasve shqiptarë në Tetovë, të cilët vizatuan hartën etike të Shqipërisë.

“Çdokush ka të drejtë të vizatojë harta. Mund të vizatojë edhe hartën e botës dhe të shkruaj kjo është republika ime dhe çfarë të bëjnë ta dërgojnë në Hagë dhe ta akuzojnë për krime kundër gjithë botës? Çfarë janë këta barbarë, primitivë, kjo është e patolerueshme”, ka deklaruar Rama, pak përpara takimit me kryetarin e BDI, Ali Ahmeti.

VIZATUAN HARTËN E SHQIPËRISË, ARRESTOHEN

Ngjarja ndodhi 4 ditë më parë në Tetovë ( Maqedoni) ku, sipas medias vendase, policia arrestoi katër anëtarë të Aleancës Kuq e Zi për shkak se kanë vizatuar grafite me flamuj kuq e zi dhe hartën e Shqipërisë Entike.

Sipas policisë bëhet fjalë për 3 persona nga Tetova dhe një nga Dibra, të moshës 20 dhe 22 vjeçare. Ata kanë vizatuar grafitet në hyrje të Tetovës, kurse policia i ka arrestuar ditën e Pavarësisë, rreth orës 10:00 të paradites.

Bashkë me hartën e Shqipërisë Entike ata e kanë shkruar edhe parullën “Një gjuhë, një komb, një shtet”.
Arrestimin e katër anëtarëve të saj e ka dënuar ashpër Aleanca Kuq e Zi e cila i kërkon me forcë shtetit shqiptar të mbajë qëndrim për këtë akt të shëmtuar dhe tendecioz të policisë maqedonase, e cila, sipas AK u cënon shqiptarëve të Maqedonisë të drejtën e përdorimit të flamurit kombëtar.