Shoqata letër BE: 570 punonjës të
shkarkuar padrejtësisht nga Bashkia e Tiranës

Shoqata për mbrojtjen e të larguarve nga administrata i është drejtuar përmes një letre Bashkimit Europian, ku i shpreh shqetësimin për largimet nga puna në Bashkinë e Tiranës. Sipas një njoftimi të shpërndarë për mediat, thuhet se Shoqata ka vënë në dijeni institucionet e BE për rreth 570 të shkarkuarit në datën 31 dhjetor 2015, në ndërmarrjen e Ujësjellës Kanalizime në Tiranë, në kundërshtim me ligjin dhe Kodin e Punës.

“Këta punonjës sot po përballen me një heshtje totale për zgjidhjen e këtij problemi, asnjë nga drejtuesit e institucionit nuk pranon të japë shpjegime për largimin e këtyre punonjësve. Përballë një situate të paprecedentë në të cilën askush nuk dëgjon zërin e tyre, ne sot kërkojmë ndihmë nga ju për të monitoruar nga afër çdo largim nga puna dhe çdo zëvendësim të këtyre punonjësve nga Administrata e Bashkisë”, thuhet në këtë letër.

Gjithashtu, Shoqata për mbrojtjen e të larguarve nga puna informon Bashkimin Europian se të shkarkuarit nga Bashkia e Tiranës janë profesionistë dhe të arsimuar. “Mbështesni të gjithë ata specialistë që prej vitesh punojnë me ndershmëri profesioniste dhe të arsimuar që sot po përballen me presionin e përditshëm të largimit nga puna. T’i mbështesni dhe të qëndroni në kontakt të vazhdueshëm me institucionet shqiptare. Me shpresën e një reagimi dhe mbështetje sa më të shpejtë nga ju”.