I vihet tritol makinës së prokurorit Arjan Muça, ka në dorë dosjet e Vettingut! Mjeti përdorej edhe nga bashkëshortja gjyqtare! Eksplozivi mesazh paralajmërues për të dy (VIDEO)

Mbrëmjen e sotme i është vënë tritol makinës së prokurorit Arjan Muça, te Komuna e Parisit në Tiranë! Shpërthimi me tritol në makinën Mercedez A Class në pronësi të prokurorit, ka ndodhur kur mjeti ka qenë i parkuar në parkimin e qendrës tregtare Kristal. Duke nisur nga sasia e vogël e lëndës plasëse të vënë në makinë, dyshohet se shpërthimi ka qenë një mesazh kërcënues për prokurorin ose për bashkëshorten e tij gjyqtare Gentiana Muça, duke qenë se makina përdorej dhe nga kjo e fundit.

Drejtori i Policisë së Tiranës, Rebani Jaupi ndërsa dha detaje për këtë ngjarja deklaroi se nga shpërthimi nuk ka persona të lënduar. Makina e prokurorit ka shpërthyer në pjesën e përparme të saj dhe në ato momente nuk ka pasur njeri aty pranë. Deri më tani nuk dihen autorët, por janë sekuestruar kamerat e sigurisë për të zbardhur ngjarjen. Makina e prokurorit parkohej në këtë qendër tregtare çdo natë prej një periudhe 2 vjeçare.

Arjan Muça është prokurori i çështjes së “Gërdecit” e konsideruar si dosja më e bujshme për vetë faktin se pati një bilanc të tmerrshëm në viktima dhe dëme materiale. Vite më parë, Muça ka qenë oficer gjyqësor në ish Gjykatën e Krimeve të Rëndë në Tiranë, më pas kaloi në prokuror në Lezhë, në Gjirokastër dhe në disa qarqe të tjera. Aktualisht Muça është një prej  6 prokurorëve te komanduar pranë KLP në Tiranë. Pozicioni që mban momentalisht si inspektor në KLP, ka të bëjë me sektorin e hartimit të dosjeve e raporteve për gjyqtarët dhe prokurorët që kalojnë në Vettingun.

Nuk dihet kush ka qenë objektivi i këtij shpërthimi, prokurori Arjan Muça apo gruaja e tij, Gentiana Muça, e cila është gjyqtare, pasi makina përdorej nga të dy. Nisur nga ky fakt hetimi lidhur me vënien e tritoli është përqendruar si te prokurori ashtu edhe te bashkëshortja e tij gjyqtare. Më parë Gentjana Muça ka qenë gjyqtare te gjykata administrative e Gjirokastrës ndërsa tani është te gjykata e Apelit në Tiranë.

Nuk dihet ende nëse vënia e tritoli në makinë ka lidhje me ndonjë nga çështjet që ata kanë drejtuar, por policia deri më tani ka shoqëruar disa persona në polici që mund të kenë dijeni për ngjarjen.

Policia dhe grupi hetimor ndodhen në vendin e ngjarjes për të zbardhur rrethanat. "Me datë 11.03.2021, rreth orës 19:30, tek Komuna e Parisit, në rrethana ende të paqarta ka shpërthyer dyshohet si pasojë e lëndës plasëse mjeti i parkuar në pronësi të shtetasit A. M., ku ka vetëm dëme materiale. Grupi hetimor ndodhet ne vendngjarje dhe po punon për zbardhjen e plotë të  rrethanave të ngjarjes.  Shërbimet e Policisë po kontrollojnë zonën si dhe janë ngritur pika kontrolli me qëllim  kapjen e autorit", thotë policia.

Rendit zhvillimet sipas orarit:

Të Fundit Të Parat

/b.ha./Shqiptarja.com

TAG:
• Tirane
• komuna e parisit
• tritol
• KPK
• vetingu
• KLP
• Arjan Muça
• Gentjana Muça