Në përfundim të ditës së suksesshme në Luksemburg, kryeministri Rama ka postuar një foto me ekipin negociues shqiptar.

Rama shpjegon detyrat që ka lënë BE-ja pikërisht për këtë grup kapitujsh duke vënë theksin në fushën e mirëqeverisjes, sundimit të ligjit dhe antikorrupsionit.

Kështu shefi i qeverisë ju dërgon një mesazh të gjithë atyre që kanë dyshime për qëllimet e komisionit të Fatmir Xhafajt, duke thënë se do të jetë pikërisht ky komision që do të përmbushë detyrat e lëna nga Unioni.

“Një moment historik kurorëzimi i përpjekjeve të mëdha të deritanishme në fushën e mirëqeverisjes, sundimit të ligjit dhe antikorrupsionit*

Shqipëria hapi zyrtarisht negociatat për Grup-Kapitujt, “Themeloret”:

-Funksionimi i institucioneve demokratike

-Reforma në administratën publike

-Gjyqësori dhe të drejtat themelore

-Drejtësia, liria dhe siguria

-Kriteret ekonomike

-Prokurim publik

-Statistikat

-Kontrolli financiar

*mbase përmbajtja e këtij Grupi-Kapitujsh dhe volumi i detyrave për t’u kryer, do t’ua ndriçojë fillin e arsyes edhe të gjithë atyre që ngritën akuza të paarsyeshme kundër Komisionit të Posaçëm Parlamentar për Mirëqeverisjen, Sundimin e Ligjit dhe Antikorrupsionin", shkruan Rama. 

Shqipëria çeli më 15 tetor 2024 negociatat për grup-kapitullin e parë me Bashkimin Evropian. Konferenca e dytë ndërqeveritare u mbajt në Luksemburg, ku vetë përfaqësuesit e Brukselit bënë thirrje për përshpejtim të procesit. Nga ana tjetër kryeministri Edi Rama e konsideroi në ditë historike, por pa kursyer edhe këtë kritikat ndaj BE-së për zvarritjen e procesit.