TIRANE, 24 Qershor/ATSH/-Ministri i Punëve të Jashtme, Ditmir Bushati zhvilloi një takim pune me Ministrin e Punëve të Jashtme të Izraelit, Avigdor Liberman.
Në fokus të bisedimeve ishte agjenda e bashkëpunimit dypalësh Shqipëri-Izrael, ku palët diskutuan për nivelin aktual të marrëdhënieve politike dhe impaktin e tyre në rritjen e investimeve të drejtpërdrejta izraelite në vendin tonë, programet e bashkëpunimit shkencor dhe akademik, shkëmbimet e ekspertizës në sektorë si energjetika, bujqësia, menaxhimi i ujërave, teknologjia e lartë etj. Ministri Bushati theksoi se Qeveria shqiptare po merr masat e nevojshme për krijimin e një klime sa më të favorshme për investimet e huaja të drejtpërdrejta, si dhe paraqiti mundësi të reja të zgjerimit të kapitalit izraelit në Shqipëri.
Ministri i Punëve të Jashtme të Izraelit, Avigdor Liberman, konfirmoi angazhimin e tij personal për zhvillimin e një agjende dypalëshe dinamike me Shqipërinë.
Ai vërejti se biznesi izraelit është në kërkim të tregjeve të reja dhe se Shqipëria është një destinacion i sigurt për ta. Në vijim të këtij angazhimi, Ministri Liberman konfirmoi rëndësinë e intensifikimit të konsultave diplomatike mes dy vendeve.
Dy Ministrat shkëmbyen gjithashtu mendime mbi situatën në Ballkan dhe Evropën Juglindore, si dhe u ndalën në zhvillimet më të fundit në Lindjen e Mesme, duke veçuar ngjarjet e fundit në Siri dhe Irak.
Gjatë qëndrimit në Jerusalem, Ministri Bushati zhvilloi një takim dhe me Ministren e Drejtësisë së Izraelit, znj. Tzepora Livni gjatë të cilit u diskutua mbi bashkëpunimin e deritanishëm në fushën e drejtësisë.
Në cilësinë e Kryenegociatores për paqen me palestinezët, Ministrja Livni bëri një ekspoze të përqasjes së Izraelit ndaj bisedimeve për paqen në Lindjen e Mesme.
 Në Parlamentin e Izraelit (Kneset), Ministri Bushati u takua me Nënkryetarin e Parlamentit, Hamed Amar, i cili është dhe Kryetar i Grupit të Miqësisë Shqipëri-Izrael të Knesetit dhe me deputetë të tjerë, me të cilët u diskutua për instrumentet bashkëpunimit parlamentar në marrëdhëniet mes dy vendeve./a.gegvataj/