Trump e nominoi për ambasador në Shqipëri, Wendt shpall prioritetet para Senatit: Do mbështes punën e SPAK, luftë korrupsionit dhe krimit të organizuar (FJALA E PLOTË)

Lufta kundër korrupsionit dhe mbështetja për SPAK-un ishin në qendër të raportimit të kandidatit të Presidentit për ambasador të SHBA-ve në Shqipëri, Eric Wendt, përpara Komitetit të Marrëdhënieve me Jashtë në Senatin amerikan. Ai e cilësoi SPAK si një institucion të pavarur dhe apolitik dhe vlerësoi bashkëpunimin me agjencitë amerikane të zbatimit të ligjit.

***

Lufta Kundër Korrupsionit do të jetë një nga prioritetet kryesore të Eric Wendt, kandididati për ambasador në Shqipëri, i nominuar nga Presidenti Donald Trump.

Gjenerali me një eksperiencë 34-vjecare në ushtrinë amerikane, raportoi prioritetet e tij përpara Komitetit të Jashtëm në Senatin Amerikan. Lufta kundër korrupsionit dhe trafikut ndërkombëtar të drogës, mbante vendin e parë, nëse ai do të konfirmohet në detyrë si ambasadori i ardhshëm i SHBA-ve në Tiranë.

"Prioritetet e mia kryesore do të jenë mbrojtja e qytetarëve amerikanë dhe avancimi i interesave amerikane. Mbështetja ndaj Shqipërisë në vazhdimin e luftës kundër korrupsionit, si edhe kundër krimit të organizuar ndërkombëtar dhe trafikut të drogës të lidhur me kartelet latino-amerikane të drogës, do të ndihmojë për ta bërë Amerikën dhe Shqipërinë më të sigurta",- tha Wendt.

Ëendt u pyet specifikisht mbi rolin dhe punën e SPAK, të cilën e vlerësoi si një strukturë të rëndësishme jo politike. 

“Prokurorët i nënshtrohen një kontrolli të kujdesshëm, përfshirë edhe testin e poligrafit. Ata kanë hetuesit e tyre specialë dhe Byronë Kombëtare të Hetimit. Nëse konfirmohem, do të shtyj përpara dhe do të mbështes punën e tyre të papolitizuar. Ata kanë komunikim të rregullt me SHBA-në. Puna e tyre do të jetë kritike, për sa kohë që mbeten të papolitizuar",- tha Wendt.

Një pjesë e debatit u fokusua edhe tek shqetësimet për interesat e njerëzve pranë Presidentit Trump në Ballkan. Senatorë demokratë ngritën dyshime se persona të lidhur me Presidentin amerikan mund të përfitojnë nga marrëveshje biznesi në rajon, përfshirë edhe në Shqipëri.

“Nuk jam në dijeni të investimeve personale të familjes Trump në Shqipëri, por nëse ka pyetje mbi ato ndërveprime, do t’ju drejtoja tek ata. Detyra ime si ambasador i SHBA-së është të lehtësoj bizneset amerikane, të gjitha bizneset amerikane pa trajtim preferencial apo diskriminues bazuar në personalitete. Detyra ime është të sigurohem që gjërat bëhen në mënyrën e duhur, që sundimi i ligjit respektohet dhe që fusha e lojës është e barabartë",- tha Wendt.

Gjatë raportimit të tij, Ëendt vlerësoi me superlativa shqiptarët referuar bashkëpunimit që ka patur me trupat shqiptare të misioneve ushtarake në NATO dhe në Afganistan.

“Forcat speciale shqiptare mishërojnë shpirtin luftarak të heroit shqiptar Skënderbeu dhe vetë populli shqiptar është krenar, punëtor dhe mikpritës",- tha Wendt.

Më 13 prill Presidenti Trump, propozoi emërimin e gjeneralit në pension Eric Ëendt si ambasador i ri amerikan në Shqipëri. Gjatë më shumë se 34 viteve shërbim aktiv, ai ka mbajtur disa pozicione të larta komanduese dhe ka drejtuar organizata me deri në mijëra personel ushtarak, civil dhe ndërinstitucional.

Shqipëria nuk ka një ambasador të SHBA-së që prej largimit të Yuri Kim në vitin 2023. Një nominim i mëparshëm nga Joe Biden për David Kostelancik nuk u miratua nga Senati, ku pritet të kalojë edhe kandidatura e Eric Wendt.

Fjala e plotë e Eric Wendt

Kryetar Risch, Anëtare e Rangut Shaheen dhe anëtarë të komitetit, jam i nderuar dhe mirënjohës ndaj Presidentit Donald Trump për besimin që ka treguar ndaj meje me këtë nominim për postin e Ambasadorit të Shteteve të Bashkuara në Shqipëri. 

Për më shumë se 34 vite, i kam shërbyer Shteteve të Bashkuara të Amerikës si ushtarak aktiv. Kam kaluar katër vite e gjysmë në këmbësori dhe 30 vite si Green Beret. Gjatë kësaj periudhe, kam qenë i caktuar për dy vite pranë Departamentit Amerikan të Shtetit, ndërsa drejtoja një koalicion me tetë vende si Koordinatori Amerikan i Sigurisë për Izraelin dhe Autoritetin Palestinez. Në atë detyrë, operoja çdo ditë si pjesë e Ambasadës Amerikane në Jerusalem, duke raportuar drejtpërdrejt te Sekretari Amerikan i Shtetit.

 Që prej largimit nga shërbimi ushtarak, kam pasur privilegjin të jap mësim për komandën dhe lidershipin në universitetin tim pasuniversitar alma mater, Naval Postgraduate School në Monterey.

 Sot, bashkëshortja ime ndodhet jashtë vendit, në Okinaëa, së bashku me dhëndrin tonë, kapiten në Forcat Ajrore të SHBA-së, si edhe me vajzën dhe mbesën tonë, për të ndihmuar në kujdesin për një tjetër mbesë që sapo ka ardhur në jetë.

 Djali ynë, toger i parë në Ushtrinë Amerikane dhe parashutist në Divizionin e 82-të Airborne, ndodhet ulur pas meje. Ai dhe bashkëshortja e tij po i shërbejnë vendit ndërsa janë të stacionuar në Fort Bragg.

 Ne jemi një familje që e do Shtetet e Bashkuara të Amerikës dhe jemi mirënjohës për mundësinë për t’i shërbyer një vendi kaq të jashtëzakonshëm.

 Si Komandant i Forcave Speciale të NATO-s, trupat speciale shqiptare ishin pjesë e komandës sime dhe kam punuar me ta në terren në Shqipëri. Në Afghanistan, kam shërbyer si Zëvendëskomandant i një komande rajonale ku bënin pjesë edhe trupat shqiptare.

 Kam vërejtur se forcat speciale shqiptare mishërojnë shpirtin luftarak të heroit shqiptar Skanderbeg dhe se vetë populli shqiptar është krenar, punëtor dhe mikpritës.

Nëse konfirmohem, prioritetet e mia kryesore do të jenë mbrojtja e qytetarëve amerikanë dhe avancimi i interesave amerikane.  Nëse konfirmohem, në post do të përdorim katër linja veprimi ndërsa vlerësojmë rrugën tonë përpara për të zhvilluar më tej planin e Ambasadës për vendin.

 Linja e parë do të eksplorojë mënyra për ta bërë Amerikën më të sigurt. Mbështetja ndaj Shqipërisë në vazhdimin e luftës kundër korrupsionit, si edhe kundër krimit të organizuar ndërkombëtar dhe trafikut të drogës të lidhur me kartelet latino-amerikane të drogës, do të ndihmojë për ta bërë Amerikën dhe Shqipërinë më të sigurta.

 Së dyti, do të punojmë për ta bërë Amerikën më të mbrojtur. Këto veprime do të përfitojnë gjithashtu sigurinë shqiptare. Do të punoj me përkushtim për të mbështetur progresin e Shqipërisë drejt Marrëveshjes së Samitit të NATO-s në Hagë 2025 për të rritur në mënyrë të menduar shpenzimet për mbrojtjen në 5% të PBB-së deri në vitin 2035, duke mbështetur njëkohësisht rritjen e kapaciteteve kibernetike të SHBA-së dhe Shqipërisë dhe duke shqyrtuar iniciativa me përfitim të ndërsjellë në fusha të ndryshme ushtarake.

 Së treti, fokusi ynë do të jetë ta bëjmë Amerikën më të begatë. Këto përpjekje do të sjellin njëkohësisht përfitime edhe për prosperitetin e Shqipërisë. Ndërsa sektorët shqiptarë të inteligjencës artificiale, energjisë, infrastrukturës, minierave dhe sektorë të tjerë ekonomikë zhvillohen, bizneset dhe investitorët amerikanë duhet të përballen me kushte të barabarta kontraktuale dhe ligjore.

 Së katërti, fokusi ynë do të jetë vetë posti diplomatik, duke përfshirë një linjë kyçe përpjekjeje që unë e quaj “faktorët njerëzorë”, e cila do të synojë të përdorë mënyra standarde dhe krijuese për t’u kujdesur për pjesën më të vlefshme të postit — njerëzit e tij — si publikisht dhe në karrierat e tyre profesionale, ashtu edhe përmes informacioneve që ata janë të gatshëm të ndajnë privatisht dhe personalisht.

 Në përfundim, nëse konfirmohem, pres me padurim të bashkëpunoj me anëtarët e këtij komiteti dhe partnerët tanë në Shqipëri për të arritur këto objektiva të rëndësishëm. Dhe mirëpres çdo pyetje që mund të keni.

U.D/K.M/Shqiptarja.com

TAG:
• Eric Wendt
• SHBA
• Senati amerikan
• korrupsion