Shtëpia-muze e Vangjush Mios
nis restaurimi i banesës në Korçë

Piktori Vangjush Mio mes veprave të tij nuk ka harruar të pikturojë edhe këtë imazh të bukur të shtëpisë tij në një nga lagjet më karakteristike të saj.



Për vlerat etnografike që mbart dhe për faktin se aty lindi një nga piktorët më të shquar shqiptarë, kjo shtëpi është shpallur shtëpi muze. Në shtëpinë e Piktorit të Popullit Vangjush Mio këto ditë kanë filluar punimet restauruese për ta shpëtuar ndërtesën karakteristike nga degradimi i plotë, njofton drejtoria e Monumenteve të Kulturës në Korçë.
 
Tashmë kanë filluar ndërhyrjet me riparimin e çatisë dhe të mureve anësore që kishin pësuar çarje.
 
Punimet në këtë monument kulture të kategorisë së parë, pritet të përfundojnë pas dy javësh. 
 
Banesa muze e Piktorit të Popullit Vangjush Mio, është një nga me të vizituarat në qytetin e Korçës. Por pamja e jashtme e saj ishte lënë jashtë vëmendjes dhe ndërtesa rrezikon shembjen nga çarja e mureve dhe dëmtimi i trareve mbajtës.