Shuhet Marianthi Xhako, regjisorja
e parë e dokumentarit në Shqipëri

Ka ndërruar jetë pasditen e së dielës në moshën 81-vjeçare regjisorja Marianthi Xhako-Qemo. E vlerësuar me titullin “Artiste e merituar”, Marianthi Xhako konsiderohej si një nga krijueset veterane te ish Kinostudios “Shqipëria e re”.
 
“Ndarja nga jeta e regjisores se talentuar Marianthi Xhako-Qemo është një humbje e madhe jo vetëm për familjen e saj, por edhe për artin filmik dhe komunitetin e kineastëve”, shprehet regjisori Kujtim Gjonaj.

[gallery]22728[/gallery] 
Marianthi Xhako regjisore e filmave kronikale dhe dokumentare u lind ne Berat me 2 nëntor 1936. Atje ajo kaloi fëmijërinë dhe mori mësimet e para deri në përfundim të shkollës së mesme me vlerësime maksimale.
 
Mbasi kreu studimet e larta për regjisurë në Institutin Kinematografik të Moskës në ish BS, në vitin 1960 filloi punë si regjisore në Kinostudion “Shqipëria e re".
 
“Gjatë më shumë se tri dekada ajo realizoi shumë filma dokumentarë e kronikalë, ku më të spikaturit janë: “Qyteti i një mbi një dritareve”- 1959 dokumentari me të cilin Xhako mbrojti diplomën në Bashkimin Sovjetik. “Reportazh nga Kurbneshi”, “Burim i pashtershëm”, “Nënë Shqipëri” (mbi motivet e poemës me të njëjtin titull të Dritero Agollit), “Viti 1924”, “Margarita dhe Kristaqi”, “Hasan Prishtina”, “Piktori Buza”, “Tefta Tashko” dhe shume e shume dokumentare të tjerë”, shprehet Kujtim Gjonaj, duke shtuar më teje se “Në krijimtarinë e Marianthit, përveç artit dhe talentit frymëzues spikat patriotizmi dhe ndjenja e dashurisë për Shqipërinë dhe njeriun e thjeshtë”.
 
Për kontributin e saj ne artin kinematografik Marianthi Xhako është nderuar me titullin Artiste e merituar dhe me disa çmime në festivalet e filmit.
 
Ajo është regjisorja e parë dhe një nga më të talentuarat të dokumentarit shqiptar. Gjate karrierës se saj realizoi rreth 60 filma dokumentarë.


Marianthi Xheko Qemo, studente ne Moske meTodi Bozo, Viktor Gjika, Dhimiter Anagnosti

Redaksia Online
Al.N/Shqiptarja.com