Siri, ndërpritet armëpushimi e evakuimi,qeveria akuza rebelëve
Zhvendosja e civilëve dhe rebelëve në pjesën lindore të Aleppos është pezulluar nga qeveria siriane, e cila akuzon kundërshtarët e saj se kanë shkelur disa nga pikat e marrëveshjes së evakuimit.
Alepo- Ditë plot ankth dhe frikë për të gjithë banorët e Alepos.
Mesa duket çdo minutë po luhet me fatin e të pafajshmëve të cilët kërkojnë shpëtim.
Ndonëse dukej se evakuimi po vijonte i qetë,zhvendosja e civilëve dhe të plagosurve në pjesën lindore të Aleppos është pezulluar nga qeveria siriane, e cila akuzon kundërshtarët e saj se kanë shkelur disa nga pikat e marrëveshjes së evakuimit.
Burime qeveritare shprehen se janë pikërisht rebelët ata që kanë bllokuar evakuimin e civilëve.
Raportimet konfirmojnë se militantët kanë qëlluar mbi autobusët të cilët po zhvendosin civilët dhe të plagosurit.Më shumë se 3000 persona janë zhvendosur nga pjesa e Alepos Lindore por sipas Kombeve të Bashkuara në vend janë të bllokuar më shumë se 50.000 civilë.
Ndërsa ushtria qeveritare e mbështetur nga Rusia ka ripushtuar pjesën më të madhe të zonave të cilat ishin nën kontrollin e rebelëve, Shtetet e Bashkuara e kanë akuzuar ashpër dhe në mënyrë të drejtpërdrejtë qeverine e Damaskut.
“Ajo që regjimi i Assad po kryen nuk është asgjë më pak sesa një masakër.
Një politikë cinike për të terrorizuar cilvilët”, deklaroi sekretari amerikan i shtetit John Kerry.Në samitin e BE-së, kancelarja gjermane Angela Merkel e përshkroi situatën në Aleppo si shumë të trishtë duke theksuar se diplomacia europiane dështoi.
Nga ana tjetër, presidenti i Këshillit të BE-së Donald Tusk kërkoi hapjen e menjëhershme të korridoreve humanitare për të lejuar ndihmën që të mbërrijë në Aleppo.