Deputeti i LSI, Luan Rama ka reaguar pas deklaratës së Ministres së Mbrojtjes për blerjen e radarit të ri për hapësirën ajrore dhe vëzhgimit të atyre detarë.  Ai ngre pyetjen se përse nuk kanë qenë në punë prej më shumë se tre vitesh radarët ekzistues.

“Zonja Ministre e Mbrojtjes paska thënë se Ministria e Mbrojtjes do të blejë radarë të rinj! Po përse nuk kanë qenë në punë prej më shumë se tre vitesh radarët ekzistues, kur do të na e thotë?!

Po përse sistemi i radarëve është venë në shërbim të grupeve kriminale të trafikantëve të drogës, kur do të na e thotë?! Po përse janë cënuar standardet e sigurisë kombëtare në kontrollin e hapësirës detare të Republikës së Shqipërisë kur do të na e thotë?!” shkruan ai.

Xhaçka deklaroi sot se do të jenë 400 mln lekë shtesë për buxhetin e mbrojtjes për blerjen e sistemit radar ajror, ndërsa do të ketë grupe pune me ministrin Xhafaj për vëzhgimin e hapësirës detare.

Iniciativa për vëzhgimin e hapësirës detare vjen pas akuzave të LSI dhe opozitës se nuk funsionojnë ose janë fikur radarët për të favorizuar trafikun e drogës. 

dy.b/shqiptarja.com