Arrestohet Berisha i "Bandës së Niklës", iu rikthye grabitjeve 
...
Autori i grabitjes me armë të kambistit dy ditë më parë në Fier, duhet të ishte në burg sipas dënimit të Gjykatës së Krimeve të Rënda. Por skandalet e drejtësisë shqiptare nuk njohin kufij dhe këtë herë është vendimi 162, datë 4 dhjetor 2014 që i ka dhënë lirinë Kreshnik Berishës ish-anëtarit të bandës famëkeqe të Niklës.
Gjyqtarja Nazmije Pengili nga Gjykata e Krujës ka vendosur t’i japë lirinë Berishës, por këtë herë lirinë ai e ka shfrytëzuar për tu rikthyer në aktivitetin kriminal të grabitjeve me armë.
Kreshnik Berisha, i njohur si person me të shkuar kriminale i dënuar me 17 vite burg në vitin 2008, dënim i konfirmuar edhe nga Apeli i Krimeve të Rënda, një vit më vonë për një seri grabitjesh me armë në kuadër të grupit të strukturuar kriminal dhe anëtar i bandës së Niklës.
Grabitësi i prangosur dy ditë më parë nga Policia e Fierit veç lirisë së fituar me kusht ka përfituar nga bujaria e gjyqtarëve dhe 1.5 vite ulje dënimi.
Por skandali thellohet kur kërkesat e tij për liri me kusht ishin refuzuar më parë nga Gjykata e Tiranës. Për të rifituar këtë liri, Berisha, dredhoi duke u transferuar në burgun e Fushë- Krujës, nga ku kërkoi në Gjykatën e këtij rrethi lirimin e tij me kusht.
Një vit pas dënimit të dhënë nga Gjykata e Apelit ndaj Berishës, si pjesë e grupit kriminal i drejtuar prej tij dhe Flamur Hakës, në shkurt 2010 Kreshnik Berisha përfitoi uljen e parë të dënimit me 90 ditë nga gjyqtari Martin Deda.
Një vit më vonë në mars 2011 i njëjti gjyqtar i uli atij po 90 ditë. Po kaq i ditë Berisha i përfitoi edhe nga gjyqtari Kreshnik Omari në vitin 2012.
Uljen e radhës, Berisha, e përfitoi nga gjyqtari Petrit Çomo me 18 prill të vitit 2013. Ndërkaq në vitin 2014, Berisha, përfitoi uljen e fundit 90 ditëshe të dënimit nga gjyqtari Bujar Krasniqi.
Edhe pse kjo kërkesë e Berishës, ka qenë e bazuar në Kodin e Procedurës Penale, në vitin 2014, tri kërkesa të tjera për ulje dënimi i ishin refuzuar Berishës, nga Gjykata e Tiranës.
Ndërkaq nesër Gjykata e Shkallës së Parë në Fier, pritet të shqyrtojë masën e sigurisë ndaj Berishës, si dhe ndaj Dritëro Lajthisë i dyshuar si bashkëpunëtor i tij.
Ndërkaq masa e sigurisë për grabitjen e kambistit pritet të shqyrtohet në mungesë edhe ndaj një personi të tretë identiteti i të cilit nuk është bërë i ditur nga policia.
Redaksia Online
(Gre.M/Shqiptarja.com)
