Prej më shumë se një muaji, Mali i Zi po përballet me një aferë që ka tronditur skenën politike dhe institucionet e shtetit. Në qendër të saj janë Dejan Vuksiç, ish-drejtor i Agjencisë Kombëtare të Sigurisë (ANB), dhe Mirjana Pajkovic, ish-sekretare shtetërore në Ministrinë e të Drejtave të Njeriut dhe Pakicave.

Skandali shpërtheu pasi në rrjetet sociale u përhapën pamje me përmbajtje eksplicite dhe regjistrime intime, të cilat lidhen me Pajkovic. Menjëherë pas publikimit, të dy dhanë dorëheqjen nga funksionet shtetërore, duke deklaruar se po largoheshin për “arsye personale”.

Pajkovic ka paraqitur tre kallëzime penale, duke pretenduar se materialet intime janë shpërndarë pa pëlqimin e saj. Ajo akuzon Vuksiç se e ka kërcënuar me publikimin e tyre dhe se ka përmendur ekzistencën e pamjeve komprometuese edhe publikisht.

Ajo ka publikuar edhe një audio-regjistrim, ku dëgjohet zëri i Vuksiç që thotë se “i gjithë Mali i Zi do t’i shohë” pamjet intime.

Vuksiç i mohon akuzat. Ai thotë se nuk ka shpërndarë asnjë material dhe se pamjet i ka parë për herë të parë vetëm pasi nisën të qarkullonin në publik. Sipas tij, në tetor 2024 Pajkovic i ka marrë në mënyrë të paligjshme telefonin celular, i cili më pas është keqpërdorur.

Ai pretendon se nga ky keqpërdorim ka dalë edhe audio-regjistrimi kërcënues, ku dëgjohet zëri i tij. Vuksiç thotë se në mars 2025 është shantazhuar nga persona të panjohur, të cilët i kërkonin të tërhiqej nga kandidatura për gjyqtar në Gjykatën Kushtetuese, përndryshe audio do të publikohej.

Sipas tij, kjo ishte tentativë shantazhi dhe ndikimi të paligjshëm në një proces kushtetues. Për këtë arsye, ai ka bërë kallëzim penal ndaj Pajkovic dhe personave të tjerë të paidentifikuar.

Në këtë aferë përmendet edhe zyra e presidentit të Malit të Zi, Jakov Milatovic, pasi në audio thuhet se kërcënimi është bërë nga një telefon fiks në zyrën e presidentit, ku Vuksiçka punuar më herët si këshilltar. Presidenti nuk është i akuzuar në këtë rast.

Vuksiç ka paralajmëruar gjithashtu padi ndaj personave që, sipas tij, e kanë fyer dhe kërcënuar në rrjete sociale, si dhe ndaj një deputeti që e ka quajtur publikisht “person të dhunshëm”.

Sipas Kodit Penal të Malit të Zi, shpërndarja e materialeve intime pa pëlqimin e personit të përfshirë dënohet me deri në pesë vjet burg. Kjo vepër penale njihet si e ashtuquajtura “porno hakmarrëse” dhe është futur relativisht vonë në legjislacionin penal të vendit.

Agjencia Kombëtare e Sigurisë ka deklaruar se nuk merret me korrespondencë private dhe se materialet intime nuk kanë lidhje me punën e saj. Prokuroria deri tani nuk ka dhënë një qëndrim publik dhe nuk dihet ende nëse rasti do të ketë një epilog gjyqësor.