SKEMË MASHTRIMI/ FBI-ja arrestoi miliarderin kinez që sponsorizoi sulmet ndaj Hunter Biden

Miliarderi kinez Guo Wengui, i lidhur me ish-këshilltarin e Donald Trump, Steve Bannon, u akuzua për mashtrim pasi SHBA-ja i sekuestroi dhe 634 milionë dollarë në lidhje me dyshimet për krimet e kryera prej tij. Guo u arrestua të mërkurën në orën 6:24 të mëngjesit nga agjentët e FBI-së në apartamentin e tij luksoz në hotelin Sherry-Hollande në Manhattan.

Guo dhe këshilltari i tij financiar, Kin Ming Je, u akuzuan për konspiracion, mashtrim me letra me vlerë dhe pastrim parash, të detajuara në një aktakuzë prej 38 faqesh. Ming Je po hetohet në liri, tha në një deklaratë prokurori amerikan i Manhattan, Damian Williams, citon Fortune.

Guo, një kritik i ashpër i Partisë Komuniste Kineze, ishte i njohur për pretendimet për korrupsion politik kundër zyrtarëve të lartë të partisë. Duke jetuar në mërgim në SHBA që nga viti 2015, atij ju ngrinë asetet në Kinë dhe Hong Kong pas hetimeve për financat e tij. Ai kërkoi azil politik në SHBA në vitin 2017 pasi regjimi kërkoi ta arrestonte përmes Interpolit.

Lidhja me Steve Bannon

Biznesmeni 54-vjeçar, bashkëpunëtor i Steve Bannon, prej kohësh është objekt i problemeve ligjore. Në vitin 2020, mbledhësi i fondeve të Trump, Elliott Broidy u deklarua fajtor për lobim të paligjshëm në Shtëpinë e Bardhë gjatë kohës së Trump ku kërkoi ekstradimin e Guo dhe mbylljen e hetimit për “1MDB”, fondit malajzian që u përfshi në qendër të një skandali global të ryshfetit. Trump më vonë e fali Broidin.

Bannon, kryestrategu i fushatës presidenciale të Trump në vitin 2016, ishte në bordin e jahtit të Guo në vitin 2020 kur ai u arrestua për mashtrim në lidhje me një grup jofitimprurës që mori donacione private për të ndërtuar murin në kufirin SHBA-Meksikë. Bannon, të cilin Trump e fali për akuzat federale, ende përballet me akuza të ngjashme në gjykatën e shtetit të Nju Jorkut.

Në vitin 2018, prokurorët thanë pretenduan se Guo krijoi dy grupe, Shoqërinë e Sundimit të Ligjit dhe Fondacionin e Sundimit të Ligjit, për të tërhequr njerëz që mbështesnin përpjekjet e tij kundër Partisë Komuniste.

Prokurorët pretendojnë se Guo dhe Je kërkuan para nga ndjekësit e tyre për një vendosje të paregjistruar të aksioneve për GTV Media Group, duke shitur 452 milionë dollarë në aksione të zakonshme. Qeveria thotë se dyshja mblodhën 262 milionë dollarë të tjerë nga tregu i Himalaya Exchange. Wall Street Journal raportoi në vitin 2020 se Bannon dhe Guo ishin dy nga njerëzit kryesorë pas GTV.

Sulmet ndaj Hunter Biden

GNews, një media e grupit mediatik GTV të të dyshes Guo dhe Bannon, publikuan gjatë fushatës së fundit presidenciale histori të shumta të rreme rreth Hunter, djalit të presidentit Joe Biden. Grupi ishte gjithashtu  burim i hershëm i thashethemeve të pabazuara se familja Biden fshehu marrëdhëniet e biznesit në Kinë – trillime që u përmendën edhe nga ish-presidenti Donald Trump gjatë debatit të dytë presidencial, shkruan Foreign Policy.

Disa javë përpara se New York Post të publikonte serinë e saj të 14 tetorit 2020 të artikujve mbi përmbajtjen e të ashtuquajturit “hard disku i Hunter Biden”, akuzat për materiale të shumëfishta që do të inkriminonin Biden u transmetuan më 25 shtator 2020 nga Lude Media, një kanal në YouTube i drejtuar nga transmetuesi disident dhe aleati i Guo-s, Wang Dinggang. Ato më pas u shpërndanë nga llogaritë në Twitter të lidhura me GNews dhe me lëvizjen Himalaya të Guo dhe Bannon, sipas një artikulli në Daily Beast, së bashku me vetë Bannon, i cili u mburr në një TV holandez në fund të shtatorit (2020) se kishte hard diskun e Hunter Biden.

Wang është i afërt me Guo dhe është fotografuar me Bannon dhe Rudy Giuliani, por kjo nuk është prova e vetme që ai ishte i përfshirë në përhapjen e thashethemeve ndaj Biden. Në një transmetim të drejtpërdrejtë të Lude Media të 13 tetorit 2020, të transmetuar disa orë përpara se NY Post të publikonte historitë e saj, Wang dhe një analist tjetër thanë se NY Post-i do të publikonte përmbajtjen e hard disqeve ditën tjetër.

Llogaritë në Twitter të lidhura me Guo vazhduan të përhapin një sërë pretendimesh të rreme në rritje për Bidenin, duke përfshirë thashethemet e ngjashme me Pizzagate për abuzimin me fëmijët që filluan gjithashtu nga Wang dhe Lude Media, së bashku me histori të rreme rreth marrëdhënieve të familjes Biden me Partinë Komuniste Kineze.

Publikimi i kasetave të supozuara të seksit, të cilat gjithashtu pretendonin se tregonin Hunter Biden duke përdorur drogë gjatë një vizite në Pekin, u përhapën nga ndjekësit e Guo në një fushatë në Twitter të 24 tetorit të koordinuar në një grup bisedash të lëvizjes Himalaja Discord.

Bannon ka thënë se çelësi për t’u marrë me median është “të mbytësh zonën me mut” – dhe paratë e Guo i dhanë ish-kryeredaktorit të Breitbart një pozicion kryesor në një rrjet dezinformimi që jo vetëm që  prishi diskursin publik, por u armatosur nga Guo për të shënjestruar disidentë të tjerë të cilët ai u zotua se do t’i “eliminonte”./Hashtag.al

SI.E./Shqiptarja.com

TAG:
• Hunter Biden
• FBI
• Guo Wengui
• Steve Bannon
• SHBA
• Kine