Teheran, miliona njerëz i japin lamtumirën gjeneralit të vrarë, ofrohen 80 milion dollarë për 'kokën' e Trump

Disa ditë pas vrasjes së gjeneralit iranian Qassem Soleimani, tabloidi  izraelit ‘Yediot Ahronot’ ka përmbledhur sot në një grafik, figurat që janë vënë në shënjestër për tu eleminuar nga SHBA.

Emrat e cituar janë në krye të organizatave terroriste mes të cilëve janë  Imad Mughnyeh (Hezbollah) dhe Mohammed Suleiman, një gjeneral sirian i përfshirë në ndërtimin e një reaktori bërthamor.

Lista përfshin edhe Hassan Nasrallah (Hezbollah), Sallah al-Aruri dhe Mohamed Deif (Hamas) dhe Ziad Nakhale, udhëheqës i Xhihadit Islam .

Vajza e gjeneral Soleimanit, i vrarë të premten gjatë një sulmi amerikan me raketa, paralajmëroi se Shtetet e Bashkuara do të përballen me ditë të zeza për vrasjen.

“Hej, i çmenduri Trump, ti je simbol i budallallëkut dhe një lodër në duart e sionisteve. Mos mendo se me vrasjen e babait tim mori fund gjithçka”, tha ajo.

Kërcënimeve të Iranit, Presidenti amerikan iu përgjigj me një postim në Twitter.

“Shtetet e Bashkuara do të kundërpërgjigjen shumë shpejt dhe ashpër në mënyrë disproporcionale”, shkroi Trump.

Një turmë oqeanike, e cila pushtoi të gjitha sheshet kryesore të Teheranit, i dha lamtumirën e fundit gjeneralit të Forcave Quds, Qassem Soleimani, i vrarë të premten e kaluar në një sulm amerikan në Bagdad.

Mbi trupin e Soleimanit, lideri Suprem i Iranit, Ayatollah Ali Khamenei, u lut mes lotësh dhe premtoi se SHBA do të përballen me një Vietnam të dytë.

Manifestuesit kanë bërë thirrje që çdo iranian të jepte një dollar për të mbledhur një dhuratë prej 80 milion dollarësh për tja dhënë kujtdo që do të dorëzojë kokën e "burrit të çmendur me flokë të verdhë", duke aluduar për Presidentin e Shteteve të Bashkuara Donald Trump, i cili urdhëroi vrasjen e gjeneralit.

Por Vrasja e gjeneralit iranian nuk është një lojë për vetë SHBA dhe Iranin.

Pas tre ditësh heshtjeje dhe deklarata të përgjithshme, ka nisur të shfaqet qëndrimi i parë i qartë europian mbi zhvillimet e fundit në Lindjen e Mesme, pas vrasjes nga ana e SHBA të gjeneralit iranian Qassem Soleimani.

Europa është e shqetësuar për situatën shpërthyese që është shfaqur në Gjirin Persik.

Josep Borrel ka kërkuar të lehtësohet tensioni dhe i ka dërguar një mesazh në Twitter Ministrit të Jashtëm iranian Javad Zarif duke e këshilluar Iranin të mos bëjë lëvizje të rrezikshme. Borreli gjithashtu ftoi Zarifin në Bruksel të diskutojë gjithashtu për ruajtjen e marrëveshjes bërthamore me Teheranin.

Për Ministrin e Jashtëm të Mbretërisë së Bashkuar lufta nuk është në interes të askujt dhe palët duhet të ulin armët dhe të nisin dialogun.