Sot zgjedhjet për Kongresin e SHBA-ve! Biden: Demokracia është në fletëvotim! Trump: Unë votova për DeSantis! Alarm për bombë në një qendër votimi në Luiziana

Balanca e pushtetit në Kongresin amerikan do të përcaktohet të martën, ndërsa votuesit shkojnë drejt qendrave të votimit për të vendosur nëse demokratët do të vazhdojnë të mbajnë shumicën në Senat dhe Dhomën e Përfaqësuesve, duke mbështetur politikat e presidentit Biden, ose duke e zhvendosur pushtetin tek republikanët. Korrespondentja e Zërit të Amerikës, Katherine Gypson, njofton nga një prej shteteve kyçe në Zgjedhjet 2022, shtetin jugor të Xhorxhias.

Nga Pensilvania në Ohajo, nga Nevada në New Hemsher, kandidatët bënë thirrjet e fundit në garat, që do të vendosin për drejtimin që do të mbajnë Shtetet e Bashkuara për dy vitet e ardhshme dhe në shtetin kyç të Xhorxhias, dita fillon me një lutje dhe një paralajmërim nga kandidati republikan për në Senat, Herschel Walker.

"Duhet të votojmë siç duhet, në të kundërtën nuk do ta njohim më këtë vend nesër", tha Walker.

Mbështetësit e zotit Walker janë të irrituar nga presidenti Joe Biden.

“Pas gjithë asaj që kanë bërë demokratët, unë thjesht nuk mund të rri duarkryq dhe të lejoj që vendi thjesht të shkojë prapa. Kriza kufitare është jashtë kontrollit dhe nuk duket se Joe Biden do të bëjë gjë për të”, tha Emmett Shead, votues në Xhorxhia.

Në një sondazh të fundit të Qendrës Kërkimore Pew, më shumë se tre të katërtat e votuesve të anketuar thanë se ekonomia ishte shqetësimi i tyre kryesor në këto zgjedhje.

“Tregu i shtëpive, çmimi i benzinës, ju e dini. Artikujt ushqimore po bëhen gjithnjë e më të shtrenjtë dhe disa artikuj as nuk mund t’i gjejmë më”, tha Amanda Douglas, votuese në Xhorxhia.

Kundërshtari i zotit Walker, senatori demokrat Raphael Warnock, ishte ai që u dha demokratëve kontrollin e senatit në vitin 2021, duke fituar në një garë të ngushtë pas balotazhit.

“Ekonomia është çështja numër një për mua dhe mendoj se Partia Demokrate dhe senatori Warnock, në veçanti, fokusohen vërtet në çështjet e përditshme të amerikanëve. Republikanëve u pëlqejnë të flasin për tregun e aksioneve dhe çdo gjë tjetër”, tha Warnock.

Dhe pas vendimit të Gjykatës së Lartë në qershor që i dha fund të drejtës federale për abortin, çështjet sociale kanë motivuar gjithashtu votueset femra dhe të pavarurit të votojnë për demokratët.

“Kjo është shumë shqetësuese për mua. Mendoj se të gjithë duhet të kenë qasje në kujdesin shëndetësor, cilatdo qofshin pikëpamjet tuaja personale, për abortin”, tha Theresa Allmend, votuese në Xhorxhia.

Gara në Xhorxhia është një ndër më të rëndësishmet për kontrollin e Senatit dhe ndër të paktat gara për në senat, tepër e ngushtë për t’u parashikuar. Partia që do të kontrollojë Senatin pritet të kryesojë me një ndryshim të vogël numrash. Ndërsa në Dhomën e Përfaqësuesve sot votohet për të 435 vendet dhe sipas shumicës së sondazheve, republikanët pritet të marrin kontrollin. /VOA

Ditën e sotme një qendër votimi në Luiziana, SHBA u zhvendos nga një shkollë në një tjetër pas një kërcënimi me bombë, sipas raportimit të John Tobler, zv. Sekretar i Komunikimit në Departamentin e Shtetit të Luizianës.

John Tobler tha se kërcënimi për bombë shënjestronte një shkollë e cila ndodhej 20 minuta larg New Orleans. Vendndodhja e re e votimit është një shkollë fillore në të njëjtën zonë të quajtur Audubon Elementary.

Një përfaqësues i Departamentit të Policisë së Kennerit deklaroi se e njëjta shkollë mori një kërcënim për bombë pesë ditë më parë. Nxënësit e shkollave të mesme u evakuuan atë ditë dhe policia lokale dhe departamentet e zjarrfikësve kontrolluan kampusin, por se nuk u gjet asnjë shenjë lëndeje plasëse.

Ish-presidenti Donald Trump konfirmoi të martën se votoi për guvernatorin e Floridës Ron DeSantis, duke parashikuar një "natë të shkëlqyer" për republikanët. 

"Po, e bëra, unë votova për DeSantis. Unë mendoj se do të kemi një natë shumë të mrekullueshme dhe është emocionuese. Ata kanë bërë një punë fantastike", u tha Trump gazetarëve.

Trump hodhi votën e tij pak pas orës 11:30 të mëngjesit me orën lokale, në Qendrën Rekreative Morton.

E ardhmja politike e ish-presidentit mund të varet kryesisht nga rezultatet afatmesme të së martës, pasi ai kërkon që të mbizotërojnë kandidatët e tij të zgjedhur dhe të miratuar në garat kryesore federale dhe mbarëkombëtare. 

Humbjet e mëdha për kandidatët e mbështetur nga Trump mund të krijojnë pengesa për fushatën e tij presidenciale 2024, të cilën Trump synon ta shpallë një javë nga sot.

Një sezon i trazuar zgjedhjesh në Amerikë, që u shoqërua sërish nga ndasitë e mëdha politike dhe që ngriti pikëpyetje lidhur me angazhimin ndaj një të ardhmeje demokratike përfundon të martën, ndërsa amerikanët votojnë në zgjedhjet e para kombëtare të presidencës së demokratit Joe Biden.

Demokratët po përgatiten për rezultate zhgënjyese, të shqetësuar se mund të humbasin kontrollin e Dhomës së Përfaqësuesve dhe atë të Senatit, që dikur mendonin se do ta ruanin shumicën e vogël që kishin. Guvernatorët aktualë të partisë demokrate në shtetet si Uiskonsini, Miçigani dhe Nevada po ndeshen gjithashtu me rivalë seriozë republikanë.

Gjatë kthimit në Shtëpinë e Bardhë të hënën mbrëma pas një tubimi të fundit fushate, Presidenti Biden tha se ai mendonte se demokratët do ta mbanin Senatin, por e pranoi se ruajtja e shumicës në "Dhomën e Përfaqësuesve është më e vështirë".

Partia Republikane ishte optimiste për shanset e saj, duke thënë se mesazhi i saj i përqendruar tek ekonomia, çmimet e karburantit dhe krimi do të tërhiqte votuesit në një kohë të shtimit të inflacionit dhe dhunës në rritje. Republikanët janë të bindur se zemërimi që rrjedh nga vendimi i Gjykatës së Lartë për të hequr të drejtën kushtetuese të grave për abort është zbehur dhe tradicionalisht zgjedhjet për Kongresin që përkojnë me mesin e mandatit të një presidenti janë bërë një lloj vlerësimi për punën e tij.

"Do të jetë një referendum mbi paaftësinë e kësaj administrate", tha ligjvënësi republikan i Minesotës, Tom Emmer, i cili po drejton përpjekjet e Partisë Republikane për të rimarrë kontrollin e Dhomës së Përfaqësuesve.

Rezultatet mund të kenë një ndikim të thellë në dy vitet e fundit të mandatit të Presidentit Biden. Kontrolli nga republikanët qoftë edhe i njërës dhomë të Kongresit, do ta linte zotin Biden të pambrojtur ndaj hetimeve mbi familjen dhe administratën e tij, ndërsa ai do të përpiqej të mbronte arritjet e tij politike, duke përfshirë ligjin për infrastrukturën, si dhe atë të kujdesit shëndetësor dhe shpenzimet për çështjet sociale. Republikanët gjithashtu mund ta bëjnë më të vështirë rritjen e tavanit të borxhit dhe mund të kufizojnë mbështetjen për Ukrainën në luftën e saj kundër Rusisë.

Nëse republikanët do të arrijnë fitore të thellë, mund të shtohet trysnia ndaj zotit Biden për të mos vënë kandidaturën në zgjedhjet presidenciale të vitit 2024. Ish-presidenti Donald Trump, ndërkohë, mund të përpiqet të përfitojë nga një paraqitje e fortë e Partisë Republikane, duke shpallur zyrtarisht kandidaturën e tij në Florida javën e ardhshme. Zgjedhjet për Kongresin vijnë në një moment të paqëndrueshëm për Amerikën, e cila doli këtë vit nga pandemia e rëndë e COVID-19 dhe tani po përballet me sfida të forta ekonomike. Gjykata e Lartë hoqi të drejtën kushtetuese për abortin, që ishte në fuqi për pesë dekada.

Në zgjedhjet e para kombëtare, që nga sulmi i 6 janarit të vitit 2021 ndaj Kapitolit, e ardhmja demokratike e vendit është në pikëpyetje. Disa njerëz që morën pjesë, ose ishin në afërsi të sulmit vdekjeprurës ndaj Kapitolit, pritet të fitojnë në zgjedhjet e së martës, madje edhe në ato për postin e anëtarit të Dhomës së Përfaqësuesve. Një numër i kandidatëve republikanë për Sekretar Shteti, përfshirë ata që konkurrojnë në Arizona, Nevada dhe Miçigan, kanë refuzuar të pranojnë rezultatet e zgjedhjeve presidenciale të vitit 2020. Nëse fitojnë të martën, ata do të menaxhojnë zgjedhjet e ardhshme presidenciale në shtetet që janë shpesh kyçe në garat presidenciale.

Demokratët e pranojnë se ka një prirje kundër tyre në këto zgjedhje. Me përjashtime të rralla, partia e presidentit humbet vende në zgjedhjet që përkojnë me mesin e mandatit të tij të parë. Mbështetja e ulët për punën e Presidentit Biden i vështirëson më shumë përpjekjet e demokratëve për të fituara garat e ngushta. Sipas një sondazhi të muajit tetor nga agjencia e lajmeve Associated Press dhe Qendra për Studimin e Çështjeve Publike-NORC, vetëm 43% e amerikanëve thonë se mbështesin punën e Presidentit Biden. Në të njëjtin sondazh, vetëm 25% thanë se vendi po shkon në drejtimin e duhur.

Megjithatë, aleatët e Presidentit Biden kanë shprehur shpresën se votuesit do të refuzojnë republikanët që kanë kontribuar në krijimin e një mjedisi ekstrem politik.

"Mendoj se ajo që ne po shohim tani është vetëm një parti me busull morali. Dhe një parti që dëshiron të rrëmbejë pushtetin", thotë Cedric Richmond, ish këshilltar i lartë i Presidentit Biden në Shtëpinë e Bardhë që tani punon në Komitetin Kombëtar Demokrat. 

Ky është një mesazh tërheqës për 49 vjeçarin Kevin Tolbert, i cili punon dhe jeton në Southfield të Miçiganit. Ai planifikon të mbështesë kandidatët demokratë mes shqetësimeve për të ardhmen e demokracisë.

"Është diçka që duhet mbrojtur dhe ne e mbrojmë atë (demokracinë) duke votuar, duke mbështetur vendin tonë. Mendoj se është shumë e rëndësishme që ta mbrojmë atë, sepse ne mund të përfundojmë në situata të ngjashme me ato që i kemi parë në të kaluarën, diktatorë e të tjerë. Ne nuk kemi nevojë për këtë", thotë zoti Tolbert.

Por në Merilend, ku demokratët kanë një nga shanset e tyre më të mira për të rimarrë postin e guvernatorit të mbajtur nga republikanët, Shawn Paulson thotë se kishte "shumë pikë-pyetje, por jo hetime të mjaftueshme" për rezultatet e zgjedhjeve të vitit 2020.

"Nuk duhet të jetë një gjë negative ose e paligjshme në asnjë mënyrë të flasësh për atë që do të bësh për të përmirësuar sigurinë", tha zoti Paulson, një 45-vjeçar që drejton degën e Partisë Republikane në Qarkun e Kentit.

Zyrtarët e zgjedhjeve federale dhe shtetërore dhe prokurori i përgjithshëm i emëruar nga vetë zoti Trump, kanë thënë se nuk pati prova të besueshme që tregojnë se zgjedhjet e vitit 2020 ishin të manipuluara. Akuzat e ish-presidentit për manipulim të zgjedhjeve janë mohuar edhe nga gjykatat e vendit, duke përfshirë edhe gjyqtarë të emëruar nga vetë zoti Trump.

Në zgjedhjet e së martës, votuesit amerikanë do të vendosin për tridhjetë e katër vende në Senat dhe demokratët i kanë përqendruar përpjekjet për të ruajtur kontrollin në Pensilvani, Xhorxhia, Uiskonsin dhe Arizona. Garat në këto shtete ndoshta do të vendosin se cila parti do të kontrollojë Senatin, i cili aktualisht është i ndarë 50 me 50, me Nënpresidenten demokrate Kamala Harris që ka votën përcaktuese. Demokratët shpresojnë të fitojnë në garat për Senatin në shtetet e Ohajos dhe Karolinës së Veriut, ndërsa republikanët besojnë se mund të fitojnë ndaj senatorëve demokratë në Nevada dhe ndoshta në Nju Hempshër.

Të martën votuesit do të zgjedhin tridhjetë e gjashtë guvernatorë shtetesh. Demokratët i kanë përqendruar përpjekjet për të ruajtur postet e guvernatorit në Miçigan, Uiskonsin dhe Pensilvani. Këto tre shtete janë kritike për zgjedhjet presidenciale, legjislaturat e tyre kontrollohen nga republikanët dhe kandidatët republikanë për guvernatorë, kanë mbrojtur gënjeshtrat për manipulim zgjedhjesh të filluara nga zoti Trump në vitin 2020.

Fitoret e republikanëve në garat për guvernatorë mund të bëjnë që shtetet të miratojnë ligje më të ashpra votimi dhe ndoshta edhe të refuzojnë të bllokojnë përpjekjet për mohimin e rezultatit të zgjedhjeve presidenciale të vitit 2024, nëse zoti Trump, ose ndonjë kandidat tjetër republikan, i humbet ato. Mes parashikimeve për fitore të republikanëve, demokratët shpresojnë se aborti mund të aktivizojë bazën e tyre dhe do të tërheqë votuesit e pavarur e të pavendosur, që janë të zemëruar nga shfuqizimi i vendimit Roe kundër Wade.

"Njerëzit e kuptojnë se kjo liri themelore është hequr.

Ata e shohin se kjo është një çështje ekonomike, një çështje e kujdesit shëndetësor, një çështje e lirisë dhe ata janë të zemëruar", thotë Alexis McGill Johnson, presidente e organizatës “Planned Parenthood Federation of America”, e cila ka shpenzuar 150 milionë dollarë për të mobilizuar votuesit "që zakonisht nuk votojnë" në zgjedhjet për Kongresin që përkojnë me mesin e mandatit të Presidentit.

Megjithatë, Presidenti Biden përballet me mundësinë e drejtimit të një Uashingtoni të ndarë. Ndërsa po kthehej nga një tubim fushate në mbështetje të kandidatit demokrat për guvernator në Merilend, Wes Moore, zoti Biden u pyet se cili do të ishte realiteti i tij i ri, nëse Kongresi kontrollohet nga republikanët.

Ai u përgjigj duke thënë: "Më i vështirë"./ VOA

 

Një zyrtar zgjedhor në Filadelfia tha të martën se gati 3600 fletëvotimi të dërguara me postë rrezikojnë të refuzohen për shkak të informacionit të pasaktë, datave të munguara ose mungesës së zarfeve të fshehtësisë.

Kryetarja e Komisionerëve të Qytetit të Filadelfias, Lisa Deeley, publikoi emrat e votuesve të prekur dhe u kërkoi atyre të ndërmarrin hapa të menjëhershëm për të marrë fletëvotimet zëvendësuese.

Veprimi i Deeley erdhi pasi Gjykata e Lartë e shtetit javën e kaluar ndaloi zyrtarët e zgjedhjeve vendore të numëronin fletëvotimet me data të munguara ose të pasakta në zarfin e kthimit.   

"Jam jashtëzakonisht e zhgënjyer nga vendimi i Gjykatës së Lartë të Pensilvanisë në lidhje me fletët e votimit pa datë dhe datë të gabuar. Datat e shkruara me dorë nuk janë materiale dhe mungesa e një date të tillë nuk duhet të jetë një arsye për të hequr të drejtën e një votuesi”, tha Deeley në një deklaratë.

Kërkesa e Pensilvanisë që votuesit të nënshkruajnë dhe të japin një datë të shkruar me dorë në zarfin e kthimit të fletëve të votimit ka qenë subjekt i proçesit gjyqësor për muaj të tërë. Disa grupe të Pensilvanisë, ngritën një padi në gjykatën federale, duke sfiduar planin e shtetit për të mos numëruar fletëvotimet pa datë.

Sipas Gjykatës së Lartë fletëvotimet me data të munguara ose të pasakta quhet "një teknikë e pakuptimtë", dhe se hedhja e një fletëvotimi mbi këto arsye shkel ligjin federal të të drejtave civile.

Më shumë se 45 milionë fletëvotime janë hedhur tashmë në 47 shtetet ku shifrat ishin të disponueshme, sipas të dhënave nga zyrtarët e zgjedhjeve, Edison Research dhe Catalist.

Votimi parazgjedhor ka qenë përpara ritmit të vitit 2018 në të gjitha shtetet ku disponohen të dhëna për tre ciklet e fundit. Megjithatë, është ende shumë herët për të ditur nëse pjesëmarrja e përgjithshme do të arrijë nivelet e vitit 2018, pasi modelet e votimit mund të kenë ndryshuar në vitet e fundit. 

Teksasi ka ende shumicën e votave parazgjedhore, me më shumë se 5.4 milionë vota. Florida ka pasur më shumë se 4.9 milionë vota dhe Kalifornia ka më shumë se 4.7 milionë. Gjeorgjia, me më shumë se 2.5 milionë vota dhe Karolina e Veriut, me më shumë se 2.1 milionë, janë të vetmet shtete të tjera me më shumë se 2 milionë vota të hedhura deri më tani. 

Numri i votave të hedhura do të vazhdojë të rritet pasi dërgohet më shumë postë, votuesit heqin fletët e votimit dhe zyrtarët zgjedhorë përditësojnë numërimin e tyre. 

Disa të dhëna për votuesit vijnë nga Catalist, një kompani që ofron të dhëna, analitikë dhe shërbime të tjera për demokratët, akademikët dhe organizatat jofitimprurëse të mbrojtjes së çështjeve dhe po jep njohuri se kush po voton përpara nëntorit.

Trump, mbajtja e të cilit në Partinë Republikane do të testohet përmes garave në të gjithë vendin ditën e sotme në ditën e zgjedhjeve, pritet t’i kalojë në shtëpinë e tij në klubin Mar-a-Lago në Palm Beach, Florida, duke parë rezultatet e zgjedhjeve me këshilltarët dhe miqtë e tij.

Të hënën, në një tubim në Dejton, Ohio, Trump sinjalizoi fuqishëm se do të shpallte kandidaturën e tij për president në 2024 më 15 nëntor.

“Për të mos zhvlerësuar zgjedhjet shumë të rëndësishme, madje edhe kritike të së nesërmes. Unë do të bëj një njoftim shumë të madh të martën, më 15 nëntor në Mar-a-Lago në Palm Beach, Florida”, tha Trump, duke folur në një ngjarje për të promovuar kandidatin për Senat JD Vance dhe republikanët e tjerë të Ohajos

Joe Biden pasi ka votuar thuhet se po ndjek një "orar mjaft të plotë" në Shtëpinë e Bardhë, sipas sekretares së tij të shtypit Karine Jean-Pierre.

Presidentët e mëparshëm shpesh kanë shpenzuar kohë duke dhënë intervista në radio ditën e zgjedhjeve në një përpjekje për të inkurajuar njerëzit të votojnë në shtete të veçanta, të cilën edhe Biden do bëjë. 

Përveç kësaj, është sugjeruar se programi i tij në ditën e zgjedhjeve do të mbetet "kryesisht privat", sipas një zyrtari të Shtëpisë së Bardhë të cituar në mediat amerikane.

Ai po planifikon të shikojë rezultatet sonte me këshilltarë të lartë dhe më pas ai do të trajtojë rezultatet e zgjedhjeve të mërkurën, tha zyrtari Jean-Pierre.

Votuesit e Karolinës së Veriut, SHBA kanë raportuar për ngacmim dhe frikësim të mundshëm në qendrat e votimit, sipas një raporti të incidentit nga bordi shtetëror i zgjedhjeve.

Në Nju Hanover, studentët të cilët kanë të drejtën e votimit u ngacmuan nga një zyrtar zgjedhor teksa po shkonin në një klasë shkolle ku bëhej votimi, raportoi bordi.

Gjithashtu, akuza të tjera përfshijnë votuesit pranë bordit duke u fotografuar teksa prisnin të hidhnin votat, raportoi bordi.

Pat Gannon, një zëdhënës i bordit, deklaroi se incidentet janë "të izoluara" dhe zbatimi i ligjit po i monitoron ato. Departamenti i Drejtësisë njoftoi gjithashtu planet për të qenë në terren në 24 shtete në ditën e zgjedhjeve për të siguruar mbrojtjen e të drejtave të votuesve.  

Sondazhet sugjerojnë se republikanët janë të gatshëm të marrin kontrollin e Dhomës së Përfaqësuesve.

Nëse e bëjnë këtë, ata do të përpiqen të bllokojnë pothuajse çdo pjesë të legjislacionit të propozuar nga Presidenti Biden.

Gjithashtu në zgjedhje janë 36 guvernatorët e shtetit dhe zyrtarë të tjerë vendorë. Këta janë njerëzit që do të mbikëqyrin zgjedhjet e ardhshme presidenciale duke përfshirë, nëse fitojnë, një numër kandidatësh republikanë që hedhin dyshime mbi rezultatin e vitit 2020.

Ka pasur një numër të madh votash me postë për zgjedhjet afatmesme që do të thotë se mund të kalojnë disa ditë para se të dihen rezultatet përfundimtare.

Presidenti i SHBA Joe Biden u tha votuesve se zgjedhjet afatmesme në SHBA janë një moment vendimtar për amerikanët për të mbrojtur demokracinë.

“Ne e dimë se demokracia jonë është në rrezik dhe e dimë se ky është momenti juaj për ta mbrojtur atë. Këto zgjedhje nuk janë një referendum, janë një zgjedhje. Është një zgjedhje midis dy vizioneve shumë të ndryshme të Amerikës”, tha Biden.

Biden kritikoi kongresmenen e Gjeorgjisë, Marjorie Taylor Greene dhe senatorin nga Florida Rick Scott dhe tha se republikanët do të braktisnin programet sociale si Medicare dhe Medicaid.

"Ata duan të vënë në vijë përfitimet e veteranëve, gjithçka", tha Biden.

Biden inkurajoi votuesit e Maryland që të kujtojnë "turmën e zemëruar që sulmoi Kapitolin e SHBA" më 6 janar 2021, duke thënë:

"Nuk mund të jesh pro-amerikan dhe pro kryengritjes është shumë e thjeshtë. Demokracia është në fletëvotim”.