GJKKO sekuestron 4 prona në Lezhë! Disa persona në bashkëpunim me zyrtarë përfituan në mënyrë të paligjshme sipërfaqe toke me vlerë 13 milionë euro

GJKKO ka sekuestruar 4 prona në Lezhë dhe ka nisur hetimin për disa persona, të cilët në bashkëpunim me njëri tjetrin dhe në bashkëpunim me zyrtarë shtetërorë, nëpërmjet dokumenteve të falsifikuara dhe veprimeve të tjera të  kundërligjshme, kanë përfituar në mënyrë të paligjshme një sipërfaqe prej 66 000 m2 tokë në disa zona bregdetare në Lezhë, me një vlerë prej rreth 13 milion euro. Sipas hetimit të SPAK, rezulton se pronat janë produkt i veprave penale “Prodhimi dhe shitja e narkotikëve”, “Trafikimi i narkotikëve”, “Grupi i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Për këtë arsye, SPAK paraqiti kërkesën që është miratuar nga GJKKO për vendosjen e masës së sigurimit pasuror “sekuestro preventive” për këto pasuri:

1. 1.      Pasuria e paluajtshme e llojit “tokë arë”, me sipërfaqe 8000 m2, Ishull Lezhë.
2. 2.      Pasuria e paluajtshme e llojit “tokë arë”, me sipërfaqe 1148 m2, Ishull Lezhë.
3. 3.      Pasuria e paluajtshme e llojit “tokë arë”, me sipërfaqe totale prej 27,009.80 m2, me adresë në Mali Rencit, Lezhë.
4. 4.      Pasuria e paluajtshme lloji i pasurisë “tokë arë”, me sipërfaqe totale prej 30,663.70 m2, me adresë në Mali Rencit, Lezhë.

Hetimet lidhur me këtë procedim penal vazhdojnë.

M.Q./Shqiptarja.com

TAG:
• sekuestrim pronash
• spak
• Lezhe