Sportet, pa zgjedhje, Rektori
padi në gjykatë senatit

TIRANE- Ndryshe nga universitete e tjera të vendit, në universitetin e sporteve të Tiranës dje nuk janë zhvilluar zgjedhjet. Kjo pasi në këtë universitet zgjedhjet janë pezulluar me vendim të ministrit të Arsimit, për shkak se senati akademik i i këtij universiteti ka pasur përplasje me rektorin, Vejsel Rizvanolli. Ky i fundit madje ka dorëzuar edhe një padi në gjykatë që me datë 6 shkurt. Në çështjen që mban nr.8234, Vesjel Rizvanolli, ka paditur senatin Akademik të Universiteti i Sporteve, Tiranë për shfuqizim apo ndryshim të aktit administrativ, që ka të bëjë me kriterin e moshës që ka vendos ky senat. “Deklarimin si absolutisht të pavlefshëm të vendimit nr.2, datë 23.01.2012 të Senatit Akademik të Universitetit të Sporteve Tiranë (në vijim UST) i cili në nenin 7.10 të Rregullores “për organizimin e zgjedhjeve për autoritetet dhe organet drejtuese në UST” ka parashikuar që: “Nuk mund të kandidojë për Organet dhe Autoritetet drejtuese të UST personat të cilët për shkak të daljes në pension nuk mund të plotësojnë mandatin 4-vjeçar”. Pezullimi i zhvillimit të procesit të zgjedhjeve për Autoritetet dhe Organet drejtuese në UST. Zhdëmtimin e dëmit (dëmit efektiv dhe fitimit të munguar) në të holla nëse në kundërshtim me Kushtetutën, Konventën Evropiane për të Drejtat e Njeriut” dhe ligjet në fuqi, do të lejohet të vazhdohet procesi i zgjedhjeve për Autoritetet dhe Organet drejtuese në UST duke m’u cënuar e drejta për t’u kandiduar për Organet dhe Autoritetet drejtuese të UST”, - është kjo padia që rektori Rizvanolli ka depozituar në gjykatë.
(ek/sg/shqiptarja.com)