Statusi, Rama takon Hollande
në Paris: Pres vendimin pozitiv

TIRANE- Kryeministri i Shqipërisë Edi Rama, në kuadër të vizitës së tij në Francë për të lobuar për statusin e vendit kandidat, është takuar me homologun e tij francez Françoise Hollande. Menjëherë pas takimit mes tyre, kryeministri Rama tha për Drejtorin e Televizionit “A1 Report”, Ilir Babaramo, se në fokus të dikutimeve me Hollande ishte çështja e statusit kandidat.

Rama ka theksuar se takimi me Hollande ka kaluar pritshmëritë e tij, duke shtuar se ndihet optimist për qëndrimin e Francës, në vendimarrjen për statusin kandidat për Shqipërinë. Më parë Rama ka uruar: “Që të marrim statusin e vendit kandidat në muajin qershor. Do të doja që të reduktohet kohëzgjatja që na pret nga integrimi në anëtarësimin në Bashkimin Europian. Thënë këtë, nuk pres që të lehtësojmë punën tonë për reformat modernizuese dhe strukturore të Shqipërisë”.

Kryeministri Edi Rama ndodhet në Francë, i shoqëruar nga Ministri i Jashtëm Ditmir Bushati, për të lobuar për statusin e vendit kandidat për Shqipërinë në kuadër të afrimit të 27 qershorit, ditën kur liderët e BE-së do të japin verdiktin e tyre për statusin e Shqipërisë, pas rekomandimit pa kushte që erdhi nga raporti i Komisionit Evropian më 4 qershor. Në kuadër të turit të lobimeve për statusin pak ditë para vendimit, Ministrja e Integrimit Klajda Gjosha, ndodhet në Holandë ku është takuar me me zyrtarë të lartë të shtetit hollandez. Po ashtu dhe krerët e opozitës kanë uruar marrjen e statusit të vendit kandidat.

Në një prononcim për mediat pas takimit me ambasadorët e Bashkimit Europian në Tiranë, kreu i PD Lulzim Basha ka theksuar qëndrimin e opozitës lidhur me marrjen e statusit, duke u shprehur se: “Shqiptarët e meritojnë atë, edhe falë reformave të ndërmarra ndër vite”. Në lidhje me takimet e zhvilluara Basha tha se “Në thelb mesazhi që u përcollëm vendeve anëtare, ishte se opozita mbështet pa kushte anëtarësimin në BE, dhe marrjen parasysh se shqiptarët e kanë merituar këtë falë reformave dhe standardeve të arritura ndër vite. Dhe ajo që shpresojmë është hapja e negociatave për anëtarësim”.


Shkrimi u botua në Shqiptarja.com (print) në 12 qershor 2014

Redaksia Online
(d.a/shqiptarja.com)