Stefan Çipa: Shqipëria nuk do të
‘spiunojë’ emigrantët e paligjshëm

TIRANË - Në 13 prill të vitit 2015, Stefan Çipa mësoi zyrtarisht se partia e tij, nuk do ta rikandidonte më për drejtimin e Bashkisë Sarandë. Shumëkush mendoi se këtu kishte përfunduar marrëdhënia e tij me Partinë Socialiste, por kjo pritshmëri u thye në 13 janar, kur kryeministri Rama i besoi atij postin e zëvendësministrit të Brendshëm.

Pak ditë më vonë, u mësua se Rama, në cilësinë e kryetarit të PS-së, i kishte besuar Çipës edhe detyrën partiake si Koordinator i PS-së në Emigracion, duke e barazuar kështu me peshën politike të 4 ministrave dhe 2 “super-deputetëve” të tjerë që drejtojnë 6 rajonet e PS-së. Në unison me detyrën partiake, projektligji i parë që Çipa mbrojti në parlament, ishte ai për regjistrimin e emigrantëve. Në një intervistë për “Shqiptarja.com”, Stefan Çipa rrëfen rrugëtimin e tij politik.