'Stop gomoneve'/ Sunak: Ai që futet ilegalisht në Britani, nuk do përfitojë kurrë azil

BRITANI E MADHE- Kryeministri britanik Rishi Sunak e ka bërë të qartë se çdo emigrant që hynë në Britaninë e Madhe në mënyrë të paligjshme, nuk do mund të përfitojë azil. Ditën e sotme , ai prezantoi projektligjin , ku tha se emigrantët që do të "hyjnë në Britani me anije të vogla" do të ndalohen dhe do të dëbohen shpejtësi.

 “Sot po prezantojmë projekligj që e bën të qartë se nëse vini këtu në mënyrë të paligjshme nuk do mund të kërkoni azil. Ne do të ndalojmë ata që hyjnë ilegalisht dhe do t’i kthejmë brenda disa javësh në vendin e tyre ose në një vend të tretë të sigurtë, si Ruanda. Pasi të jeni kthyer, do t’u ndalohet përgjithmonë, ashtu si në Amerikë apo Australi, që të hyni sërish në Britani. Kjo është mënyra se si ne do të shkatërrojmë modelin e biznesit të trafikimit të njerëzve dhe do të rimarrim nën kontroll kufijtë tanë. Njerëzit duhet të dinë që nëse vijnë këtu në mënyrë të paligjshme do të ndalohen dhe do të dëbohen menjëherë. Kur kjo të ndodhë dhe do ta dinë se po ndodh nuk do të vijnë më dhe anijet do të ndalen", tha kryeministri Rishi Sunak në një konferencë për shtyp mbi projektligjin që synon të ndalojë qëndrimin e emigrantëve të paligjshëm në Britaninë e Madhe.

Ai thotë se ky vendim ka ardhur pasi sipas tij, qytetarëve po iu bëhet padrejtësi, sepse paratë që shkojnë për këta emigrantë të paligjshëm, mund të shkojnë pikërisht për ta.

 “Është krejt e padrejtë për qytetarët britanikë që kanë hapur shtëpitë për refugjatët e vërtetë që tani duhet të shpenzojnë rreth 6 milionë paund në ditë për strehimin e emigrantëve në hotele”, tha  Sunak.

Masat e shpallura thuhet do të zgjasin ndjeshëm kufizimin, duke e bërë të pamundur hyrjen sërish në Britani, qoftë edhe si vizitor.

“Lëvizjet pritet të kenë një ndikim të veçantë tek emigrantët e Kanalit të La Manshit nga vende të sigurta, si Shqipëria”, shkruajnë mediat vendase.

Sipas të dhënave, gati 46,000 emigrantë kaluan Kanalin me varka të vogla vitin e kaluar, një dyfishim në krahasim me vitin paraardhës.

B.K./Shqiptarja.com

TAG:
• Rishi Sunak
• Britani e Madhe
• debati per shqiptaret ne britani