Kurti flet me Blinken: Miqësia jonë me SHBA-në po bëhet më e fortë! Sekretari amerikan: E falënderova për mikpritjen e afganëve të rrezikuar

Kryeministri i Kosovës, Albin Kurti ka zhvilluar telefonatë me sekretarin amerikan të shtetit, Antony Blinken me të cilin ka biseduar për pranimin e afganëve, duke shtuar se do t’iu ofrojë ambient të sigurt. Lajmin e ka bërë me dije vetë Kurti në një shkrim në “Tëitter”. Kryeministri shkruan se aleanca mes Kosovës dhe Amerikës, është e palëkundur.

“Vlerësimi për mbështetjen dhe bashkëpunimin tonë. Kosova është e nderuar të ofrojë një mjedis të sigurt dhe të sigurt për qytetarët afganë gjatë tranzicionit të tyre. Aleanca jonë me SHBA është e palëkundur dhe miqësia jonë po bëhet më e fortë”, shkroi Kurti.

Edhe sekretari Blinken, falenderoi të hënën Kosovën për strehimin e përkohshëm qytetarëve afganë të cilët kishin punuar me trupat e koalicionit të udhëhequr nga Shtetet e Bashkuara.

“Në bisedën time sot me kryeministrin e Kosovës, Albin Kurti, e falënderova qeverinë dhe popullin e Kosovës për mikpritjen e afganëve të rrezikuar. Qytetarët e Kosovës, shumë prej tyre dikur edhe vet refugjatë, sërish dëshmuan gatishmërinë dhe kapacitetin e tyre për të kontribuar për paqen dhe sigurinë globale”, shkroi sekretari Blinken.

Rreth 700 afganë të cilët u avakuan nga vendi i tyre pasi talebanët morën pushtetin, janë strehuar në Kosovë. Ishte ministri i Punëve të Brendshme të Kosovës, Xhelal Sveçla i cili bëri të ditur se deri më tani në Kosovë janë strehuar përkohësisht 683 shtetas afganë. Kosova ka marrë përsipër që t’i pranojë edhe qindra afganë të tjerë.

TAG:
• SHBA
• kosove
• Albin Kurti
• afganet
• Antony Blinken