Sulmet ndaj SHISH, Noka: Ajazi
të vijë e të mbrohet në Kuvend

TIRANE - Partia Demokratike kërkoi sot seancë dëgjimore në Komisionin e Sigurisë me kreun e Shërbimit Informativ Shtetëror, Visho Ajazi. Deputeti demokrat, njëherësh edhe nënkryetar i këtij komisioni, Flamur Noka, tha se kreu i SHISH duhet të raportojë në lidhje me situatën e krimit dhe sigurisë në vend.
 
Duke iu referuar edhe akuzave të Ministrit të Punëve të Brendshme, Sajmir Tahiri, se Visho Ajazi nuk ka dhënë asnjë informacion në lidhje me ngjarjet kriminale të ndodhura kohët e fundit, Noka ka kërkuar që Ajazi të vijë në komision që të mbrohet.
 
Deputeti i Partisë Demokratike, Flamur Noka është shprehur “Visho Ajazi të vijë në Komisionin e Sigurisë. Kreu i SHISH-it, Ajazi duhet të mbrohet nga akuzat e mazhorancës”.
 
Anëtari socialist i Komisionit të Sigurisë, Taulant Balla tha se kërkesa e demokratëve duhet zyrtarizuar përmes një letre drejtuar komisionit, ndërsa sipas procedurave pritet që Ajazi të raportojë në seancën e radhës ose pas dy seancash të Komisionit të Sigurisë.
 
Vetë kryeministri Rama do të deklaronte nga foltorja e Kuvendit se nevojën e riformatimin të Shërbimit Informativ Shtetëror. Mazhoranca ka akuzuar SHISH se nuk ka dhënë informacione në lidhje me ngjarjet kriminale në vend ndërsa opozita i ka cilësuar këto si sulme që shumica po i bën një institucioni të pavarur.
 
Ndërsa presidenti Nishani ka vlerësuar punën e kreut të SHISH, socialistët po priren drejt një ristrukturimi të këtij institucioni, duke nisur që me shkarkimin e Visho Ajazit.
 
Redaksia Online
(bg/shqiptarja.com)

/Shqiptarja.com

TAG:
• visho ajazi lika