Lufta/ Irani nis sulme të reja ndaj Emirateve! Hegseth: Ne presim që bota të shtojë përpjekjet për hapjen e Ngushticës së Hormuzit, armëpushimi nuk ka mbaruar

Mbrojtja ajrore e Emirateve të Bashkuara Arabe "po përballet aktualisht me sulme me raketa dhe dronë nga Irani".

Pwrmes njw reagimi nw rrjetin social ‘X’, Ministria e Mbrojtjes e Emirateve tw Bashkuara Arabe konfirmoi se "zhurmat e dëgjuara në disa zona të vendit janë për shkak të përgjimit të raketave balistike, raketave lundruese dhe dronëve nga sistemet e mbrojtjes ajrore të Emirateve të Bashkuara Arabe".

Po ashtu, Ministria e Mbrojtjes e Emirateve të Bashkuara Arabe theksoi se Irani lëshoi ​​dje 12 raketa balistike, tre raketa lundruese dhe katër dronë kundër Emirateve.

"Armëpushimi nuk ka mbaruar", pavarësisht shkëmbimeve të zjarrit midis Iranit dhe Shteteve të Bashkuara në Ngushticën e Hormuzit.

Këto komente i bëri Shefi i Pentagonit, Pete Hegseth, gjatë një konference për shtyp.

"Jo, armëpushimi nuk ka mbaruar. Në fund të fundit, kjo është një iniciativë e veçantë dhe e dallueshme. Ne prisnim të kishte përplasje në fillim, të cilat me të vërtetë ndodhën", tha Hegseth, duke iu referuar ndoshta ‘Projektit Liria’, por pa e përmendur atë në mënyrë të qartë.

Kryetari i Shtabit të Përbashkët të Forcave të Armatosura, Gjenerali Dan Caine, vuri në dukje se Irani ka sulmuar forcat amerikane më shumë se 10 herë që nga shpallja e armëpushimit, por shtoi se kjo bie nën "pragun për rifillimin e luftimeve në shkallë të gjerë".

Dje, Admirali Brad Cooper, komandant i Komandës Qendrore të SHBA-së, tha se Shtetet e Bashkuara kishin "hedhur në erë" gjashtë anije të vogla në Ngushticë.

Pete Hegseth raporton në një konferencë për shtyp se SHBA “nuk po kërkon një përplasje”, por Irani “nuk mund të lejohet të bllokojë vendet e pafajshme dhe mallrat e tyre nga një rrugë ujore ndërkombëtare”, duke iu referuar Ngushticës së Hormuzit.

Ai thotë se operacioni Liria është i ndryshëm nga ai që SHBA-të nisën më 28 shkurt, pasi misioni është të “mbrojë transportin tregtar nga agresioni iranian.”

Sekretari i Mbrojtjes shton se ai është “i përkohshëm”.

Hegseth e përshkruan bllokimin efektiv të Ngushticës së Hormuzit nga Irani si një formë “shantazhi ndërkombëtar” dhe e quan “të papranueshëm”.

Sipas tij, SHBA-të kanë vendosur një “kupolë të fuqishme të kuqe, bardhë e blu” mbi Ngushticën e Hormuzit. Ai thotë se kjo shërben për të siguruar mbikëqyrje 24/7 të anijeve tregtare “paqësore”, përveç atyre nga Irani.

Foto: Donald Trump

Presidenti i SHBA-së, Donald Trump, ka deklaruar se nëse vendos të kthehet në luftë me Iranin, do t'i duhen vetëm dy deri në tre javë për të arritur qëllimet e tij.

"Ne kemi eliminuar shumicën e asaj që duhet të kishim bërë, ndoshta edhe dy javë të tjera, dy javë, ndoshta tre javë. Ose arrijmë marrëveshjen e duhur, ose fitojmë shumë lehtë ushtarakisht", tha Trump gjatë një deklarate për shtyp.

Presidenti i SHBA-së thekson se "këta njerëz të çmendur nuk do të kenë një armë bërthamore".

 Trump gjithashtu deklaron se blerja e rezervave të uraniumit të pasuruar shumë të Iranit duhet të jetë pjesë e marrëveshjes.

 "Po, sigurisht. Është pjesë e marrëveshjes", thotë ai.

Trump minimizon rëndësinë e raketave balistike iraniane dhe financimin e grupeve të armatosura, dy objektiva qendrore të luftës së Izraelit.

 "Shikoni, raketat janë një gjë e keqe, por po, dhe ato duhet të jenë një kufi, por kjo ka të bëjë me faktin që ata nuk janë në gjendje të kenë një armë bërthamore", thotë Trump.

 Ai refuzon të pohojë se Irani do të pengohej nga financimi i grupeve të armatosura, duke thënë vetëm se, duke pasur parasysh dëmin në infrastrukturën energjetike të Iranit, ata nuk do të ishin në gjendje ta bënin këtë ekonomikisht

. Trump pretendon se Shtetet e Bashkuara po e mbajnë të paprekur ushtrinë konvencionale të Iranit, ndryshe nga Trupat e Gardës Revolucionare Islamike.

 "Ne nuk po kërkojmë ta shkatërrojmë ushtrinë. Ne qëllimisht kemi shmangur sulmet e tepërta ndaj tyre, sepse besojmë se ata në të vërtetë janë shumë më të moderuar", tha Trump.

Bilawal Bhutto Zardari, kryetari i Partisë Popullore të Pakistanit, pjesë e qeverisë aktuale të koalicionit në vend, tha për BBC se Irani e SHBA duhet të “shmangin përshkallëzimin” dhe të “vazhdojnë angazhimin e tyre ndaj diplomacisë”.

Pakistani “aktualisht ende po shkëmben mesazhe dhe po përpiqet të krijojë mundësi për ndërtimin e besimit”, tha ai, por incidente si “sulmet e djeshme” e “komplikojnë procesin”.

Donald Trump, në postimin e së dielës ku njoftoi planin e tij për të shoqëruar anijet tregtare përmes Ngushticës së Hormuzit, tha se “përfaqësuesit e tij po zhvillojnë diskutime shumë pozitive me vendin e Iranit”.

Edhe ministri i Jashtëm iranian Abbas Araghchi, në mesazhin e tij të së hënës ku paralajmëroi SHBA-të kundër “tërheqjes përsëri në një batak”, tha se “bisedimet po përparojnë”.

Një armëpushim dyjavor mes SHBA-së dhe Iranit u njoftua muajin e kaluar dhe ishte parashikuar të përfundonte më 22 prill.

Mesazhi i Trumpit të dielën erdhi pas planit iranian të paqes me 14 pika. Po ashtu të dielën, mediat shtetërore iraniane raportuan se Teherani po shqyrtonte një përgjigje që kishte marrë nga Uashingtoni. SHBA ende nuk e ka konfirmuar zyrtarisht nëse ka kthyer përgjigje.

Foto: Flamuri i BE-së

BE-ja "dënon fuqimisht sulmet e paprovokuara me raketa dhe dronë të Iranit kundër partnerëve tanë strategjikë në Gjirin Persik", duke shprehur solidaritetin e saj me Emiratet e Bashkuara Arabe dhe Omanin, të prekur nga agresioni iranian.

Kështu deklaroi zëdhënësi për Punët e Jashtme dhe Politikën e Sigurisë në Komisionin Evropian, Anouar El Anouni, teksa i bëri thirrje Teheranit që "t'i ndërpresë menjëherë këto sulme, në shkelje flagrante të së drejtës ndërkombëtare, dhe të respektojë sovranitetin dhe integritetin territorial të vendeve në rajon".

"Siguria në Evropë dhe Gjirin Persik është e ndërlidhur. BE-ja do të vazhdojë të punojë me partnerët tanë rajonalë për të kontribuar në deeskalimin dhe stabilitetin rajonal. Ne jemi të gatshëm të kontribuojmë në të gjitha përpjekjet diplomatike për të ulur tensionet dhe për të gjetur një zgjidhje të qëndrueshme që i jep fund armiqësive, parandalon Iranin të pajiset me armë bërthamore dhe i jep fund aktiviteteve të tij destabilizuese", tha ai.

Kryetari i parlamentit të Iranit dhe negociatori kryesor në bisedimet e muajit të kaluar me SHBA-të, tha se këto të fundit kanë rrezikuar sigurinë e transportit detar dhe energjisë në Ngushticën e Hormuzit.

Në një postim në X këtë mëngjes, pas nisjes së “Operacionit Liria” nga Donald Trump të hënën, Mohammad Ghalibaf akuzon SHBA-të për “shkelje të armëpushimit” dhe “vendosje të një bllokade” në Ngushticë.

Ai e përfundon postimin duke paralajmëruar se “status quo”-ja është “e papranueshme” për SHBA-të, ndërsa thotë se Irani “madje nuk ka filluar ende”.

Presidenti i SHBA-ve Donald Trump tha në një intervistë për Fox News se Irani do të “fshihej nga faqja e dheut” nëse vendi sulmon anijet amerikane gjatë “Operacionit Liria”.

Ai shtoi gjithashtu se Irani është bërë “shumë më i përkulshëm” në negociatat e paqes, duke theksuar se SHBA ka burime ushtarake më të mëdha se Irani.

Deklaratat e Trump vijnë pasi ai tha në Truth Social se forcat amerikane kishin goditur shtatë “anije të vogla” iraniane si pjesë e operacionit për të hapur Ngushticën e Hormuzit. SHBA gjithashtu deklaroi se ka rrëzuar dronë dhe raketa iraniane.