Sulmi i Kuvendit, Qeveria: Dhuna
nxitet nga “përfaqësuesit politik”

Qeveria e Kosovës ka reaguar pas ngjarjes së mëngjesit të sotëm, ku godina e Kuvendit të Kosovës është goditur me molotov.

Në një komunikatë të shpërndarë për mediat, Qeveria thotë se dhuna mbi institucionet ëhstë e nxitur dhe promovohet nga të ashtuquajturit “Përfaqësues Politik”.

Ajo i ka bërë thirrje udhëheqësve që të dënojnë dhe të distancohen nga këto akte, ndërkohë që policisë i ka bërë thirrje që të zbardhet ngjarja. 

Ja komunikata e plotë:
Ky akt kriminal, i drejtuar kundër institucioneve të Kosovës, është vazhdimësi e sulmeve me bomba molotov mbi Policinë, ndërtesën e Qeverisë, djegies së makinave zyrtare dhe private, si dhe ndaj shtëpisë dhe familjes se Kryeministrit, përgjegjësit e të cilave jo që nuk u ndriçuan dhe nuk u vunë para ligjit, por nuk kishte as reagime publike.
Aktet e tilla, Qeveria e Kosovës i konsideron të rrezikshme për rendin kushtetues dhe për stabilitetin e vendit, prandaj kërkon me ngulm që ato të zbardhen dhe kryesit të përgjigjen para ligjit.
Qeveria e Kosovës, po ashtu, fton të gjithë përfaqësuesit politikë, të cilët në paraqitjet e tyre publike, po përpiqen të arsyetojnë sulmet me molotov mbi shtëpitë private dhe institucionet publike, duke u thirrur në kauza krejt fiktive, që të heqin dorë nga një gjuhë e tillë.
Veprimet e tilla dëmtojnë interesat madhore të qytetarëve të Kosovës, proceset e intensifikuara eurointegruese, fuqizimin e shtetit ligjor dhe perspektivën ekonomike të vendit.
 Qeveria e Kosovës fton të gjithë përfaqësuesit politik, të cilët duke u bazuar në kauza jo të qëndrueshme, kanë nxitur dhe promovuar futjen e gjuhës së molotovit dhe mjeteve tjera joligjore në jetën politike dhe publike në Kosovë, që të distancohen nga këto akte dhe të bëhen pjesë e përpjekjeve të qytetarëve dhe të Qeverisë së Kosovës për zhvillim ekonomik, integrime euroatlantike dhe fuqizim të partneritetit strategjik me SHBA-të dhe vendet tjera mike.

Redaksia Online
(F.T/shqiptarja.com)