Sulmi në Turqi, video e autorit
të dyshuar, ai mohon akuzat

Shumë zhurmë për asgjë. Edhe një herë duket se policia turke nuk po arrin të identifikojë dhe të arrestojë agresorin e vërtetë i cili natën e ndërrimit të viteve vrau të paktën 39 persona në diskotekën Reina në Stamboll.
 
Deri më tani mediat kishin shpërndarë pamje të një 28 vjeçari i quajtur Ihake Mashrapov me origjinë nga Kirgistani, por me shumë mundësi ai nuk është i shumëkërkuari pasi i riu i pyetur si nga policia turke dhe ajo e Kirgistanit ka mohuar përfshirjen në sulm.
 
Madje mediat citojnë se Mashrapov natën e tragjedisë ishte në vendin e tij të lindjes dhe jo ne vendin e sulmit. Mëngjesin e sotëm policia turke arrestoi edhe disa familjarë të tij, ku gruaja e tij është shprehur se nuk e dinte që i shoqi kishte të bënte me shtetin islamik.
 
Edhe më herët policia publikoi foto të një personi duke e akuzuar se ai ishte i dyshuari kryesor i ngjarjes, por ky i fundit u paraqit në polici duke mohuar akuzën. E ndërsa hetimet vijojnë autoritetet turke kanë arrestuar 18 persona të akuzuar se kanë lidhje me atentatin e 1 janarit.
 
Kujtojmë se natën e ndërrimit të viteve një person me një armë në dorë hyri në diskotekën Reina të Stambollit duke vrarë 39 persona dhe plagosur shumë të tjerë duke rikthyer në minutat e para të 2017 sërish frikë dhe përgjakje Ndërsa shteti islamik mori përgjegjësinë e sulmit duke konfirmuar se aksioni u ndërmor nga një luftëtar i saj.
 
Ndërkohë parlamenti turk pak ditë pas sulmit, synon të zgjasë gjendjen e emergjencës edhe me tre muaj të tjerë, situatë e cila u vendos pas dështimit të grushtit të shtetit në 15 korriku të vitit që lamë pas.

Redaksia Online
Al.N/e.m/Shqiptarja.com