Tadic: BE kërkon njohjen
e pavarësisë së Kosovës

Presidenti serb, Boris Tadic, ka pranuar se në momentet e fundit të bisedimeve për marrjen e statusit të vendit kandidat për anëtarësim në Bashkimin Evropian, Serbisë i është kërkuar të njohë Pavarësinë e Kosovës.

Tadic për gazetarë ka thënë se kjo kërkesë është shtruar në momentet e fundit të bisedimeve.

"Ne nuk kemi pranuar një kërkesë të tillë, po as që do ta pranojmë" ka thënë Tadic. "Do ta vazhdojmë luftën tonë në një mënyrë të qetë dhe diplomatike, duke i bindur partnerët tanë dhe jam i sigurt se ata në fund do të kuptojnë se pa Serbinë si vend qendror në Ballkan nuk do të ketë Ballkan të qetë, dhe kjo është në interesin e të gjitha vendeve evropiane për të mos paguar çmimin shumë të madh siç ka qenë në vitet 90-ta".