Taksa progresive, Berisha:
Rama, stuhi në një gotë uji

TIRANË - Kryeministri Berisha në mbledhjen e qeverisë ka komentuar propozimin e socialistëve për aplikimin e taksës progresive me ardhjen e tyre në pushtet. Sipas Berishës, ky projekt i Ramës është konfirmim i braktisjes së kryesocialistit nga biznesmenët që deri dje, sipas Berishës, sponsorizonin PS.
“Ju garantoj se zoti Rama taksën progresive e ka për grupin e biznesmenëve të tij. që tani nuk e sponsorizojnë më, qëkur iku nga bashkia. Edhe drekat që shtron, rroftë Gjyshi se as Fideli me shokë nuk japin më lekë, se ska më leje ndërtimi. Politika nuk bëhet me inate, mllefe dhe kundërshtira. Deri dje, kur ishte në bashki nuk e përmendi taksën progressive. Politika e tij e taksave është fortunë në një gotë ujë”, tha kryeministri.
Në fjalën e tij të gjatë përpara ministrave, kreu i qeverisë ka deklaruar se, dy vitet në vijim janë vendimtare për mandatin e tretë qeverisës të demokratëve.
“Vota, kërkohet me vepra konkrete dhe jo me fantazi bajate dhe boshe”, tha Berisha.


BRENDA 2012, PRIVATIZOHET PËRMBARIMI
Në mbledhjen e qeverisë kryeministri tha që brenda këtij viti do të përfundojë privatizimi i shërbimit të përmbarimit.
“Përmbaruesit e sistemit publik do të marrin licensën e përmbaruesit privat menjëherë sapo të shkëpusin marrëdhëniet me shtetin. Nuk ka mënyrë më dekurajuese për gjykatat po të shohin se vendimet e tyre nuk zbatohen. Ky është profesion i rregulluar dhe tarifat duhet të kontrollohen.
Në Kushtetutën e mbretërisë, kryepërmbaruesi ishte mbreti, por ka edhe Kushtetuta të republikave parlamentare ku përmbarësues i vendimeve të GJK është kreu i shtetit, për t’i dhënë peshën vendimit të gjykatave”, tha Berisha.

REFORMA NË ARSIM, TË KUALIFIKOHEN MËSUESIT
“Është e domosdoshme që rreth 40 mijë arsimtarë të kenë mundësinë për kualifikimin e tyre. Të gjitha agjencitë e kurrikulës duhet t’i nënshtrohen një procesi të thellë reformimi, që të qëndrojnë në krye të detyrës. Leximi është një dhunti shumë e përhapur tek, por duhet të tregojmë kujdes për matematikën. Të seleksionojmë dhe të mbështesim me bursa më të mirët e matematikës në të gjitha shkollat e vendit. Të bëjmë çdo gjë që ata të marrin në dorë këtë doktrinë sa më shpejt në shkollat tona”, deklaroi kryeministri duke kërkuar nga ministria e arsimit miratimin e planit të veprimit për reformën në arsim.

(aq/shqiptarja.com)