Të gatuajmë me zonjën Vjollca/ Musaka me patate e pulë dhe Supë me kos

Musaka me patate dhe pulë

Përbërësit:

1.2 kg patate

500 gr fileto pule

1 qepë

200 gr kaçkavall i butë

Kripë dhe piper i zi

1/2 tufë majdanoz

250 gr krem kosi

2 kokrra vezë

Vaj

Përgatitja:

Qërojmë patatet dhe i presim ato në feta jo shumë të trasha. Mishin e pulës e pastrojmë dhe e presim në copëza të vogla. Ngrohim vajin dhe kaurdisim mishin derisa të zbardhet, rregullojmë shijen me kripë dhe piper dhe shtojmë në të qepën të prerë në rrathë të hollë.

E lëmë qepën në zjarr sa të ulë volumin. Lyejmë tepsinë me yndyrë dhe vendosim fetat me patate sikurse tjergullat, njëra pas tjetrës. Mbi shtresën me patate vendosim mishin, e nivelojmë atë dhe vendosim feta djathi (ose djathë të grirë). Mbi djathë vendosim fetat me patate duke shtuar rreshtin e dytë me patate, përsëri mbi patatet mish e më pas djathë. Përsëri shtojmë shtresë patate e mishi, derisa të përfundojë mishi duke i mbuluar me djathë. Në fund vendosim përsëri një shtresë patate e mbi të, përsëri djathë.

Në një tas përziejmë kremin e kosit me 2 kokrra vezë, pak kripë dhe piper i zi. Pasi ta përziejmë mirë, e mbulojmë djathin që hodhëm mbi patate me kremin e kosit, e nivelojmë mirë dhe vendosim tavën në furrë në temperaturë 190 gradë Celsius për 50 minuta.

 

Supë me kos

2 lugë gjelle vaj ulliri

1 qepë e vogël

4 thelpinj hudhra

3 lugë gjelle oriz

800 ml lëng perimesh

1 1/2 lugë gjelle miell

400 gr kos

Kripë dhe piper i zi

Arrëmoskat, nenexhik

2-3 lugë gjelle lëng limoni

2 lugë gjelle gjalp

1/2 lugë çaji piper i kuq

Përgatitja:

Në një tenxhere të thellë kaurdisim qepën të grirë imët. Sapo qepa të bëhet transparente shtojmë hudhrën të grirë imët. Shtojmë më pas orizin dhe lëngun e perimeve dhe e lemë orizin të ziejë për 15-20 minuta. Në fund shtojmë nenexhikun e grirë.

Trazojmë kosin me miellin duke e përzier mirë që të përfitojmë një masë homogjene dhe kremoze. E shtojmë më pas kosin gradualisht në supë duke e trazuar ngadalë dhe sapo të marrë një valë të lehtë e largojmë supën nga zjarri duke rregulluar shijen me kripë, piper të zi, arrë moskat dhe pak lëng limoni.

Shkrijmë në një tigan pak gjalpë së bashku me 1 lugë të vogël piper të kuq dhe pasi të servirim supën në çdo pjatë shtojmë nga një lugë çaji gjalpë të shkrirë me piper të kuq.

Ju bëftë mirë!

D.M./b.ha./Shqiptarja.com

TAG:
• rreze dielli
• receta
• zonjavjollca