Teodor Laço: Konflikti për
skenarin e Pëllumb Kullës

Teodor Laço kryetar i Bordit të Qendrës Kombëtare Kinematografike, sqaron për Shqiptarja.com të vërtetën për projektet filmike të Ilir harxhit, të cilan çuan në konfliktin mes tij dhe drejtorit të QKK, Artan Minarolli.
Si është e vërteta e këtij konflikti z.Laço? Pse nuk është pranuar projekti filmik i Ilir Harxhit?
Ilir Harxhi ka patur një skenar në diskutim vitin e kaluar në kategorinë e filmit me metrazh të shkurtër. Ishte skenari i Pëllumb Kullës. Por ai ishte shumë i gjatë si skenar, për një film të shkurtër, dhe nuk u klasifikua. Në të vërtetë i dilte një film me metrazh të mesëm diku te 50 minuta. Në këtë kalsifikim atë vit ne nuk përzgjodhëm asnjë skenar.
Por këtë vit, i njëjti skenar, të cilin ai thotë se e ka shkurtuar, nuk u paraqit në garë. Nuk e di arsyen për këtë. Të vërtetën e di drejtori i QKK-së. Ai na tha se kemi vendosur në rreguolore, që nëse nuk është regjisor me shkollë nuk e pranojmë.
Kështu që ai kishte sjellë një tjetër propozim, ku këtë herë ai ishte thjeshtë producent, ndërsa regjisor ishte një student i Akademisë së Arteve. Sërish projekti i tij nuk u kualifikua. Mori pikë mesatare dhe nuk arriti të futej në treshen e parë.
Ka ndikur edhe mos zgjedhja e projektit të dytë në këtë konflikt apo jo?
Ai në fakt donte të dinte se pse nuk u pranua skenari i Pëllumb Kullës, ku ishte vetë regjisor. Unë di se konflikti ka lindur për këtë projekt. Ne si bord nuk e dinim se skenari i tij i shkurtuar ishte paraqitur sërish këtë vit. Unë vetë e mora vesh më vonë, kur më tha se e kam paraqitur sërish projektin por s'e ka pranuar kryetari i Qendrës me pretendimin se nuk jam regjisor, i diplomuar.
(dhh/shqiptarja.com)

/Shqiptarja.com