Thaçi i gatshëm të takohet me
kryetarët e katër komunave të veriut

PRISHTINE- Zgjedhjet lokale ishin një sukses i madh për Kosovën, për faktin se u organizuan në mbarë territorin e vendit edhe në pjesën veriore, ku u zgjodhën edhe kryetarët e katër komunave të veriut deklaroi kryeministri i vendit, Hashim Thaçi në mbledhjen e Qeverisë dhe u shpreh i gatshëm të takohet me kryetarët e katër komunave veriore me shumicë serbe.

Para kabinetit qeveritar Thaçi tha se edhe në komunat e veriut do të investohet për të ndryshuar gjendjen në të mirë të qytetarëve.

”Unë pres në të ardhmen e afërt të takohem me ta, dhe të bisedojmë për mundësitë që qeveria e Kosovës ka për t’u ndihmuar, për të qenë sa më afër, për të investuar në projekte të rëndësishme për ndërrimin e gjendjes për të mirë edhe në atë pjesë të Kosovës, për të ndryshuar jetën e qytetarëve për të mirë edhe atje, në mënyrë që të koordinohemi si qeveri e Kosovës dhe institucionet legale dhe legjitime lokale”, tha ai.

Kreu i Qeverisë vlerësoi se zgjedhjet lokale ishin një sukses për Kosovën, pasi që ishin zgjedhje fer, demokratike dhe të organizuara në gjithë territorin e vendit. Por, ai shprehu besimin se zgjedhjet nacionale do të jenë edhe më të suksesshme. Thaçi shprehu besimin se me vullnetin e gjithë spektrit politik dhe me mbështetjen e institucioneve do të arrihet të përmbyllet me sukses reforma zgjedhore.

Ndërkohë, kabineti qeveritar miratoi projektligjin për ratifikimin e marrëveshjes për statusin e anëtarëve të forcave të armatosura të Republikës së Shqipërisë dhe Forcës së Sigurisë së Kosovës gjatë qëndrimit të tyre të përkohshëm në territorin e shteteve respektive, propozim-vendimin për shqyrtimin e mëtejme të kërkesës për shpronësim me interes publik për nevoja të ndërtimit të komplekseve memorial “Kulla e Zahir Pajazitit” në fshatin Orllan dhe Kompleksi Memorial i varrezave të dëshmorëve në Koshare, si dhe disa propozim-vendime të tjera.

Marrë nga "RTK"

Redaksia Online
(e.s/shqiptarja.com)