Gjatë një konference për shtyp me zv/kryeministrin dhe njëkohësisht ministrin e Jashtëm të Malit të Zi, Igor Lukshiç, Thaçi shprehu gatishmërinë që të përshpejtohet procesi dhe takimet e komisioneve të ndërsjellta nga sporadike të bëhen të rregullta.
Sipas gazetës Express, Thaçi u shpreh se kishte takuar përfaqësues të komisionit kosovar pak ditë para vizitës dhe rreth 90% e procesit është kryer, ndërsa kanë ngelur vetëm rreth 9 kilometra.
Sipas tij, nuk ka asnjë pengesë apo problem politik, gjithçka e ngelur është teknike.
Zv/kryeministri Thaçi i propozoi kryeministrit malazez Milo Gjukanoviç dhe ministrit të Jashtëm Igor Lukshiç, që me vullnet të mirë të dy palëve të përfundohet sa më shpejt ky proces dhe të shfrytëzohet takimi i datës 25 mars në Prishtinë me ministrat e Jashtëm të rajonit dhe komisionerin Johannes Hahn, si dita e nënshkrimit të demarkacionit të kufirit mes Kosovës dhe Malit të Zi.
"Një veprim i tillë jo vetëm do të ishte dëshmi e marrëdhënieve shumë të mira mes dy shteteve, por edhe një mesazh bashkëpunimi për mbarë rajonin", tha Thaçi.
