Thellohet skandali i vezëve,preken
15 shtete të Bashkimi Europian

Komisioni Europian ka njoftuar se një total prej 15 shtetesh të BE-së, plus Zvicrën dhe Hong Kongun, kanë marrë vezë të kontaminuara nga një insekticid i dëmshëm për shëndetin e njeriut, duke thelluar më shumë skandalin me ushqimet në Europë.

Një zëdhënës në Bruksel tha hetimi kriminal vazhdon dhe pas një serie aksionesh në Belgjikë dhe Holandë dy persona u arrestuan të enjten për mashtrim.

Vendet e BE-së të prekura nga skandali janë Belgjika, Holanda, Gjermania, Franca, Suedia, Britania, Austria, Irlanda, Italia, Luksemburgu, Polonia, Rumania, Sllovakia, Sllovenia dhe Danimarka.

Produktet në supermarketet britanike janë tërhequr pasi u zbulua se pretendimi për 21 mijë vezë të kontaminuara në tregje nuk ishte i vërtetë, por bëhet fjalë për më shumë se 700 mijë të tilla.

Pas arrestimit të dy drejtorëve të kompanisë holandeze, “Chickfriend”, që besohet se ka ofruar insekticidin e ndaluar për fermerët, një person i tretë i është nënshtruar kontrolleve dhe marrjes në pyetje nga hetuesit holandezë.

Javën e shkuar u bë e ditur nga ministri belg i Bujqësisë se, që në nëntor, autoritetet holandeze kishin marrë informacione për insekticidin që po përdorej në mënyrë të jashtëligjshme në fermat e vendit. Por ky informacion nuk iu ishte përcjellë vendeve të tjera.

Holanda është justifikuar duke thënë se, fillimisht hetimi ishte orientuar te mashtrimi dhe nuk kishte marrë parasysh rreziqet shëndetësore. Kur shkalla e kontaminimit u bë e ditur, 180 ferma në Holandë u detyruan të mbylleshin.

Redaksia Online
D.T/Shqiptarja.com