Tiranë, kopshti 31 pa ngrohje
Prindërit largojnë fëmijët

TIRANE-  Një pjesë e mirë e prindërve që kanë fëmijët në kopshtin nr.31 të Tiranës, e cila ndodhet në zonën e ish-bllokut, kanë preferuar që këto ditë të ftohta t'i heqin fëmijët nga ky institucion. Kjo pasi mungon ngrohja. "I bëmë lekët ilaçe për fëmijët. Kaldaja u vu para ca ditësh vetëm një javë në punë dhe tani jo më. Unë e kam hequr vajzën time", - na tregon një prindër. Ndërkohë që një tjetër na thotë se kur e merrte fëmijën e tij nga kopshti në drekë, i kishte duart akull. "Unë nuk e çova fare javës tjetër dhe as dje. I kishte duart akull kur e merrja, pasi nuk ka ngrohje. Vetëm një ngrohës të vogël që e kemi blerë ne prindërit", - na thotë një tjetër prindër që e ka hequr fëmijën e tij nga ky kopsht, i cili është rikonstruktuar vetëm një vit më parë.

Alfons Muça, drejtor i ndërmarrjes nr.1 të bashkisë, që merret me administrimin e shkollave ka deklaruar se në këto ditë të ftohta të dimrit, të gjitha shkollat, kopshtet dhe çerdhet që ngrohen me kaldaja janë furnizuar me karburantin që u nevojitet.

Si po veprohet me kopshtet e çerdhet që nuk kanë ngrohje?
Bashkia e Tiranës ka mundësuar blerjen e sasisë së karburantit që nevojitet për sigurimin e ngrohjes për fëmijët dhe nxënësit e shkollave, deri më 16 mars, ditë kur kaldajat mbyllen.

Po për kopshtin 31 ku mungon ngrohja si do veprohet?
Unë nuk e di konkretisht për këtë kopsht, por mund të them se për pjesën tjetër të objekteve ku nuk funksionon ky sistem, alternative e vetme është energjia elektrike.
(shqiptarja.com)