Tiranë, ‘Qemal Stafa’, parkingu
i Bashës mbetet në letë

TIRANE- Parkingu i premtuar nga Basha, edhe pse i ka mbaruar afati i punimeve dhe duhej të ishte përfunduar, akoma nuk është filluar. Prej dy vitesh i vetmi punim i bërë në të është rrethimi me një llamarinë. Tashmë ky shesh funksionon si parking privat me pagesë.
Në parkingun e madh pranë stadiumit “ Qemal Stafa” ende nuk ka asnjë ndërhyrje nga ana e Bashkisë së Tiranës. Edhe pse ky ishte një nga premtimet më të mëdha të kryebashkiakut  Basha gjatë fushatës, tashmë dy vjet pas marrjes së mandatit, nuk ka bërë asgje për këtë parking. Por deri më sot,  jo vetëm që nuk është realizuar premtim për ndërtimini e një parkingu të tillë, por ai nuk funksionon normalisht as si mbi tokësor. 

Aktualisht ky shesh nuk ka as  një sistem vijëzimi që i jep kësaj hapsire formën e një parkingu e megjithatë, pavarësisht premtimeve ai është një parking me pagesë. Qëndrimi i makinës aty nga ora 08:00- 20:00 kushton 100 lek. Këtë e tregon edhe tabela që lajmëron parking me pagesë dhe  është vendosur brenda këtij ambjenti. Parkimi që sipas projektit do të përfundonte më 12 shtator 2013, do të kishte 1008 vendparkime. Sipas kontratës, e cila nuk ka ndryshuar asgjë dhe me të cilën administrata e Bashës ka shpallur fitues “Gener 2”, afati i përfundimit të punimeve është një vit pas nisjes së tyre, ndërsa i gjithë parkingu nëntokësor do të jepej me koncension për 35 vjet.

Ndërtimi i një parkimi të tillë makinash në kryeqytet  do të zgjidhte një pjesë të mirë të problemit të qëndrimit të makinave të cilat në mungesë të një parkingu, shoferët janë të dertyruar të qëndrojnë vend e pavend. I gjendur në një situatë të tillë, tepër kaotike, ky parking është bërë shpesh problematik, pasi në mungesë të një sistemi vijëzimi, makinat dalin prej aty të gërvishtura dhe askush nuk di të përgjigjet për këtë. Ndërkohë, në ditën që do të zhvillohej  ndeshja për kualifikuesit e kampionatit botëror “Brazil 2014”, Ministri Tahiri ka kërkuar që hapsira para stadiumit që ishte e rrethuar, të çlirohet. Burime nga Ministria e Brendshme, kanë bërë të ditur se, “në ambjentet e stadiumit nuk do të ketë më parkim privat ”. Gjithashtu është kërkuar që edhe rreth stadiumit të çlirohen të gjitha hapsirat. Por aktualisht ky shesh  vazhdon të funksionoj si një parking privat por që nuk dihet cila do jetë forma e tij përfundimtare.
 
Shkrimi u publikua sot (31.10.2013) në gazetën Shqiptarja.com (print)

Redaksia Online
(d.d/shqiptarja.com)