Një 51-vjeçar grek është vënë në pranga pasi në valixhet e tij u gjetën 24 kilogramë e gjysmë kanabis.

Michail Prokovas, pasagjeri i fluturimit të linjës Athinë-Rinas ishte larguar nga aeroporti sapo kishte mbërritur. Ai u arrestua në Rrugën e Durrësit.

“Në kuadër të operacionit policor të koduar “Fly”, specialistët për Hetimin e Narkotikëve në bashkëpunim me Komisariatin e Policisë Rinas dhe autoritetet doganore, bazuar në informacionet e siguruara ushtruan kontroll në bagazhet e pasagjerëve të linjës ajrore Athinë–Rinas.

Gjatë kontrollit, në një valixhe u gjetën dy paketime me material bimor, të dyshuar si lëndë narkotike Cannabis sativa.

Pas veprimeve intensive hetimore u identifikua poseduesi i dyshuar i valixhes, shtetasi grek M. P., 51 vjeç, i cili ishte larguar nga aeroporti menjëherë pas mbërritjes.

Shërbimet e Policisë bënë të mundur lokalizimin dhe kapjen e tij në rrugën e Durrësit, ku u arrestua në flagrancë për veprën penale “Trafikimi i narkotikëve”.

Lënda e dyshuar narkotike u sekuestrua në cilësinë e provës materiale”, tha drejtori i policisë Tiranë, Oliger Torba.

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë