Tkurret grupi “Blushi”, Kopliku
 nuk bojkoton referendumin

Pas tërheqjes publike të Arta Dades e cila nuk u përfshi fare në debatin pas Kongresit nëse duhet apo jo që socialistët të merrnin pjesë në referendum, grupi pro Ben Blushit ka pësuar një tkurrje tjetër. Deputeti socialist i Shkodrës, Namik Kopliku, edhe pse ka firmosur në kërkesat për interpretimin statusor mbi zgjedhjen e kryetarit, nuk i është bashkuar thirrjes së Ben Blushit për të bojkotuar referendumin. Madje ai tha për “Shqiptarja.com” se dje ka marrë pjesë në fushatë për pjesëmarrjen e anëtarësisë në referendum.

Ai saktëson se vetë nuk ka marrë pjesë në votim, jo sepse nuk donte, por sepse rezulton me të drejtë vote në Tiranë, teksa ndodhej prej dy ditësh në Shkodër gjatë përgatitjes së degës së partisë për referendum. Ai saktëson se nuk i përket asnjë grupimi individësh, dhe se firma e tij në disa shkresa drejtuar KGS-së, ka pasur si qëllim vetëm interpretimin e normave statutore, dhe jo fraksionin përkrah një emrin. “Unë nuk munda të marr pjesë në votim, sepse prej dy ditësh ndodhem në Shkodër, për tu kujdesur për pjesëmarrjen e anëtarëve të partisë në referendum. Emrin si anëtar partie e kam në Tiranë. Nuk votova për arsye gjeografike, por në asnjë moment nuk kam bërë thirrje për bojkotin e referendumit.

Madje kam bërë punën maksimale që PS në Shkodër të marrë pjesë në votim. Unë nuk jam në grupin e askujt, as të kryetarit të partisë, e jo më të kurrkujt tjetër. Pjesëmarrja ime në iniciativat e mëparshme ka qenë në mbrojtje të normave statusore, dhe jo të individëve”-tha Namik Kopliku për Shqiptarja.com. Në këto kushte, Mimoza Hafizi ngelet e vetmja deputete që i qëndron fort përkrah Blushit, teksa Dade dhe Kopliku kanë riparë pozicionin e tyre. Përkrahësit e tij duket se janë tashmë jashtë grupit parlamentar, dhe të paktë që pranojnë të shprehen se i qëndrojnë kauzës së Blushit.  




Redaksia Online
(A.N/Shqiptarja.com