Topi: “Arbnori Nderi i Kombit
Politikan paqësor shkodran”

Presidenti i Republikës dekoroi pas vdekjes me urdhërin “Nderi i Kombit” Pjetër Arbnorin. Në një ceremoni të organizuar në Presidencë, Topi ua dorëzoi urdhërin bashkëshortes, Suzanës dhe dy fëmijëve të politikanit të njohur. Vlerësimi I figurës së Arbnorit, e cila njihej si një figurë aspak konfliktuale në gjirin e Partisë Demokratike, vjen në një moment, kur përplasja dhe akuzat nga elementë udhëheqës nga Partia Demokratike drejt Presidentit janë ndër më të ashprat

“Në kontrast me modelet politike konfliktuale dhe ideologjike, me sjelljet politike joqytetare dhe penguese për vendin, Arbnori kujtohet nga të gjithë për qetësinë, argumentin dhe integritetin e lartë. I zgjedhur deputet në pesë legjislatura, një nga përfaqësuesit më të denjë të qytetarisë shkodrane, Arbnori krijoi edhe në demokraci modelin e politikanit evropian, - mbështetës i vendosur i dialogut politik dhe i shtetit të së drejtës, aktivist i palodhur i të drejtave të njeriut, politikan që vendos mbi gjithçka tjetër interesin publik e kombëtar”, tha Presidenti Topi në fjalën e tij.

Sidomos në motivacionin që shoqëron urdhërin e “Nderi i Kombit”, dorëzuar vajzës së Arbnorit, Gjystina, Presidenca vazhdon të mbajë të gjallë polemikën me një tjetër figurë të Partisë Demokratike, nga Shkodra si dhe Arbnori, që është kryetarja e Kuvendit Jozefina Topalli. Në motivacion shkruhet : “Personalitetit të shquar të Shkodrës dhe të gjithë Shqipërisë, simbolit të sakrificave mbinjerëzore nën persekutimin komunist, politikanit paqësor dhe shkrimtarit të talentuar, intelektualit vizionar e qytetarit fisnik, që gjithë jetën dhe veprimtarinë e tij ia kushtoi idealeve të mëdha të demokracisë, shtetit të së drejtës dhe të përparimit kombëtar”.