TIRANE -  Shtyhet deri në fund të shtatorit afati për lëvizjen lirshme të shqiptarëve të cilët  kanë probleme me toponimet në pasaportat e fëmijëve të tyre të lindur në Greqi.

Vendimi për shtyrjen e afatit nga pala greke u konfirmua sot në mëngjes nga policia kufitare e Kakavijës.

Çështja e toponimeve shkaktoi mjaft probleme për emigrantët shqiptarë që jetojnë në Greqi, pasi shumica e tyre nuk mund të vinin për pushime në Shqipëri, ose ata që do të vinin detyroheshin të linin  fëmijët në Greqi. 
 
Shtyrja e fundit e afatit për lejimin e lëvizjes ishte më 10 gusht, kur Ministria e Punëve të Jashtme të Greqisë, zyrtarisht njoftoi Ministrinë e Jashtme shqiptare, nëpërmjet ambasadës tonë në Athinë, se do të lejohet kalimi në kufi i fëmijëve të emigranteve shqiptarë, që kanë lindur në Greqi.

Ky kalim ishte i vlefshëm deri në datën 05 shtator 2013, periudhë që përkonte edhe me përfundimin e sezonit turistik.  Kjo periudhë u shfrytëzua nga emigrantët që jetonin në Greqi, të cilët donin të vinin për pushime në Shqipëri, mund t'i merrnin me vete edhe fëmijët. Fakti që afati do të përfundonte më 5 shtator, nxiti shumë emigrantë të ktheheshin në Greqi pa skaduar afati.

Erion Veliaj, Ministri i ardhshëm i Mirëqenies Sociale dhe Rinisë ka premtuar se me të marrë detyrën qeveria e re në shtator ky problem do të gjejë zgjidhje përfundimtare.

Redaksia online
(sg/shqiptarja.com)