Transferimi fitimeve të kompanive të
huaja rriten 26% në 6 M I; bie një alibi e tatimeve

Kompanitë e huaja kanë transferuar në vendet e tyre të origjinës 116 milionë euro në gjysmën e parë të këtij viti, një shifër që është 26% më e lartë në krahasim me janar-qershorin 2014.
 
Të dhënat bëhen në ditura në bilancin e pagesave të Bankës së Shqipërisë. Sipas kësaj të fundit, të ardhurat dalëse nga investimet kanë qenë kryesisht në formën e pagesave të dividentëve dhe vlerës së fitimit të riinvestuar pjesë e investimeve direkte në Shqipëri.
 
Transferimi i fitimit është rritur ndjeshëm dy viet e fundit. Ai shënoi një kërcim në gjashtëmujorin e dytë të vitit të kaluar, teksa kompanitë nxituan të transferonin fitimet në pritje të rritjes së dividendit që u rrit nga 10 në 15% nga 1 janari 2015 (shuma e transferuar në gjysmën e dytë të vitit ishte 122 milionë euro, disa herë më e lartë se e njëjta periudhë e një viti më pare). Megjithatë, edhe në gjysmën e parë të vitit, transferimi i fitimeve ka qenë relativisht i lartë, vetëm 6 milionë euro më pak se gjysma e dytë e 2014-s dhe 24 milionë euro më shumë se gjashtëmujori i parë 2014. Kjo rrëzon një alibi të tatimeve, që kishin deklaruar se një nga arsyet e rendimentit më të të ulët sesa plani i të ardhurave nga tatim fitimi ishte transferimi i dividendëve që në 2014-n.
 
Sipas të dhënave që Monitor disponon nga tatimet, për 17 kompani të huaja me fitimet më të mëdha, fitimet në total në vitin 2014 ishin 240 milionë euro. Nga këto 70 milionë euro ishin fitimet e kompanive të telekomunikacionit (Telekom dhe Vodafone).
 
Por, rritja e fitimeve të transferuara ka ardhur kryesisht nga performanca e mirë e bankave me capital të huaj. Sipas të dhënave nga Shoqata e Bankave, fitimi i bankave me kapital të huaj ishte 93 milionë euro në 2014-n, me një rritje prej 26% në raport me një vit më parë./MONITOR/




Redaksia Online
( b.h/Shqiptarja.com )